მიუნხენის „ბაიერნმა“ გუშინ ნიკო კოვაჩი მთავარი მწვრთნელის პოსტიდან ოფიციალურად დაითხოვა. უახლოეს ორ მატჩში „ოლიმპიკოსთან“ და „დორტმუნდთან“ „რეკორდმაისტერს“ ხორვატის ასისტენტი შეცვლის, ხოლო სანაკრებო პაუზის დროს გერმანელები ახალ მწვრთნელს დანიშნავენ.
ამ ეტაპზე სამი გვარი დასახელდა - მასიმილიანო ალეგრი, ჟოზე მოურინიო და რალფ რანგნიკი.
ალეგრი და მოურინიო ამ ეტაპზე უსაქმოდ არიან და მართლაც არაა გამორიცხული ბავარიაში რომელიმე ჩავიდეს. მითუფრო, რომ ახლო წარსულში პორტუგალიელმა არაერთხელ გამოთქვა გერმანიაში მუშაობის სურვილი. რაც შეეხება რანგნიკს, სხვებთან შედარებით მისი უპირატესობა ბუნდესლიგაში მუშაობის დიდი გამოცდილებაა.
შეგახსენებთ, „ბაიერნი“ ბუნდესლიგაში 18 ქულით მეოთხე პოზიციაზე იმყოფება და უკანასკნელ 10 წელიწადში ყველაზე მძიმე მარცხი შაბათს განიცადა („აინტრახტთან“ 1:5).
