იტალიის მოქმედი ჩემპიონი „იუვენტუსი“ ლონდონის „ტოტენჰემის“ ფეხბურთელებით დაინტერესდა. Tuttosport-ის ცნობით, „ბებერი სინიორას“ წარმომადგენლები ლივერპულში იმყოფებოდნენ, სადაც „მამლების“ მოთამაშეებს პირადად აკვირდებოდნენ.
კრისტიან ერისკენი და ჰონ-მინ სონი - ეს ფეხბურთელები მოხვდნენ ტურინელთა ინტერესთა სფეროში.
ერიკსენი „იუვენტუსს“ დიდი ხანია აინტერესებს და დანიელს კლუბთან კონტრაქტი 2020 წლის ზაფხულში ეწურება. შესაბამისად, იტალიური მხარე სკანდინავიელის ხელში ჩაგდებას თავისუფალი აგენტის სტატუსით გეგმავს.
რაც შეეხება სონს, მის სანაცვლოდ მზად არიან სოლიდური თანხა გაიღონ. გარდა იმისა, რომ სამხრეთ კორეელი მოედანზეც კარგად ირჯება, „იუვენტუსისთვის“ აზიის მარკეტინგული ბაზარი პრიორიტეტულია და ვინაიდან, სონი აზიაში დიდი პოპულარობით სარგებლობს, უნდათ, რომ მისი ტრანსფერით ამ კუთხითაც იხეირონ.
სამხრეთ კორეელ ფეხბურთელს „ტოტენჰემთან“ კონტრაქტი 2023 წლის ზაფხულამდე აკავშირებს და დაახლოებით 70 მილიონ ევროდ ფასობს.
