საქართველოს კრისტალბეთ ეროვნული ლიგის 30-ე ტური ბოლნისში, „სიონისა“ და გორის „დილას“ შეხვედრით გაიხსნა. შიდა ქართლელები ბოლო დროს დიდებულ ფორმაში რომ არიან, კიდევ ერთხელ დადასტურდა.

უგოლო ტაიმის შემდეგ „დილა“ მოედანზე შეუჩერებელი იყო და მეტოქე ყველა კომპონენტში დაჩაგრა. თავდაპირველად გიორგი კუციამ შეასრულა დუბლი შემდეგ კი ალვინ ფორტესმა ორჯერ დაამწუხრა ბოლნისელები და „დილამ“ დიდი ანგარიშით, 4:0 იმარჯვა.

ეს იყო გორელთა მიჯრით მესამე გამარჯვება და შედეგად, 37 ქულა დააგროვა, რისი წყალობითაც მე-5 ადგილამდე აღზევდა. ამასობაში, "დილამ" ევროპა ლიგის საგზურისკენ გაიხედა, რადგან მეოთხე ადგილს მხოლოდ 3 ქულა აშორებს. ეს პოზიცია შესაძლოა ევროპა ლიგის საგზურის მომტანი აღმოჩნდეს. გააჩნია, როგორ დასრულდება და ვინ მოიგებს სეზონის ბოლოს დავით ყიფიანის სახელობის საქართველოს თასის გათამაშებას. „სიონი“ კი წარუმატებელ გარჯას აგრძელებს და 31 ქულით ბოლოსწინა პოზიციას იკავებს.

„სიონი“ – „დილა“ 0:4 (0:0)

გოლები: 0:1 კუცია (47), 0:2 კუცია (64), 0:3 ფორტესი (66, პენ), 0:4 ფორტესი (79)