ევროპა ლიგის 2019-2020 წლების გათამაშება დაიწყო და პირველივე ტურში შავი დღე დაუდგათ რუსულ გუნდებს. აღნიშნულ ტურნირში რუსეთის პრემიერლიგას მოსკოვის ცსკა და „კრასნოდარი“ წარმოადგენენ, რომლებიც შვეიცარიასა და ბულგარეთში განადგურდნენ.

„კრასნოდარი“, რომელსაც ჩემპიონთა ლიგაზე მოხვედრის ამბიციაც გააჩნდა (პლეი-ოფში „ოლიმპიაკოსმა“ აყარა შავი დღე), „სენტ იაკობ პარკზე“ „ბაზელს“ ეწვია და რბილად რომ ვთქვათ, სჯობდა შვეიცარიაში არ ჩასულიყო - 0:5 განადგურდა.

მერე, საქმეში მოსკოვის ცსკა ჩაერთო, რომელმაც რაზგრადში „ლუდოგორეცთან“ პირველი ტაიმი მოიგო კიდეც (1:0), მაგრამ მეორე ნახევარში „კრასნოდარს“ არ ჩამორჩა, 5 უპასუხო გოლი გაუშვა და 1:5 დამარცხდა.

ვთქვათ ისიც, რომ ევროპა ლიგისგან განსხვავებით, რუსებს ჩემპიონთა ლიგაზე ჰქონდათ წარმატებული სტარტი, რადგან „ზენიტი“ „ლიონს“ სტუმრად დაუზავდა (1:1), ხოლო მოსკოვის „ლოკომოტივმა“ „ლევერკუზენს“ გერმანიაში მოუგო (2:1).