ინგლისური „ლივერპულის“ მთავარმა მწვრთნელმა იურგენ კლოპმა „ნაპოლის“ სტადიონის გასახდელში არსებულ ვითარებაზე ისაუბრა.

მოგეხსენებათ, ორი დღის წინ გავრცელდა ფოტოები, რომლის მიხედვითაც, „სან პაოლოს“ სტადიონის გასახდელები მოწესრიგებული არაა. აღნიშნულთან დაკავშირებით, ნეაპოლეთა მთავარმა მწვრთნელმა კარლო ანჩელოტიმაც გააკეთა კომენტარი.

კლოპის განცხადებით კი, მისი გუნდი უნდა ჩავიდეს ნეაპოლში, შეეუგოს იქაურ სიტუაციას და თამაშზე იფიქროს.

„ნაპოლის“ სტადიონის გასახდელი? რამდენიმე ფოტო ვნახე, მაგრამ არ მინახავს, ლაივ-ვიდეო. ფოტო კი შესაძლოა მაისში ყოფილიყო გადაღებული. დარწმუნებული ვარ, სიტუაციას მოაგვარებენ და ჩვენ გვექნება საშხაპე და გამოსაცვლელი ადგილი. ნებისმიერ შემთხვევაში ჩვენ იქ უნდა ჩავიდეთ, მივიღოთ არსებული სიტუაცია და ვითამაშოთ.

ალისონი? უკეთაა, თუმცა მისი ტრავმა სერიოზული იყო. ვიმედოვნებთ, რომ ოქტომბრის სანაკრებო პაუზის შემდეგ დაგვიბრუნდება. რაც შეეხება კეიტას, „ნაპოლისთან“ მატჩის შემდეგ მზად იქნება“, - თქვა კლოპმა.

შეგახსენებთ, „ნაპოლისა“ და „ლივერპულის“ შეხვედრა 17 სექტემბერს, ნეაპოლში გაიმართება.