ავტოსპორტი

17:09 | 17.08.2019 | ნანახია [] - ჯერ

ფორმულა 1-ს მომავალ სეზონში შესაძლოა 22-რბოლიანი კალენდარი ჰქონდეს

უნგრეთის დიდი პრიზის დღეებში, ფორმულა 1-ის მთავარმა აღმასრულებელმა ჩიზ კერიმ, გუნდებს მომავალი სეზონიდან კალენდარში 22 ეტაპის შეტანა შესთავაზა. ამჟამად მოქმედი სპორტული რეგლამენტის შესაბამისად, სეზონში რბოლების მაქსიმალური რიცხვი არ უნდა იყოს 21-ზე მეტი. იმისათვის, რომ ეტაპების რიცხვი ერთით გაიზარდოს, ყველა გუნდის თანხმობაა საჭირო.

რბოლების რიცხვის ზრდასთან ერთად, თითო პილოტზე ძრავების გამოყენების ლიმიტი უცვლელად, სამზე დარჩება. ეს ნიშნავს, რომ გაზრდილი რბოლების შემთხვევაში, ლიმიტის დასაცავად, ერთ ძრავს რვა რბოლის გაძლება მოუწევს.

გუნდებს ასევე სეზონისწინა ტესტების რიცხვის შემცირება შესთავაზეს. ამჟამად სეზონისთვის სამზადისში, გუნდები ორ სატესტო სესიას ატარებენ, რომლებიც ოთხ-ოთხი დღისგან შედგება. ახალი წესით, ორი სესია დარჩება, ოღონდ მასში სამ-სამი დღე შევა.

22-რბოლიან სეზონზე გადასვლის სურვილი მას შემდეგ გაჩნდა, რაც ესპანეთის მთავრობამ, ქვეყნის დიდი პრიზის შენარჩუნება გადაწყვიტა. მიმდინარე კონტრაქტის შესაბამისად, ბარსელონაში წელს ჩატარებული რბოლა ბოლო უნდა ყოფილიყო. არადა, მომავალ სეზონში კალენდარს ორი ახალი რბოლა - ვიეტნამის და ჰოლანდიის დიდი პრიზები დაემატება.

ამჟამად კონტრაქტი 19 დიდ პრიზზეა გაფორმებული. ვიეტნამის და ჰოლანდიის დამატების შემდეგ, რბოლების რიცხვი 21-მდე გაიზრდება. კალენდრის გარეთ დარჩენის შანსი აქვთ გერმანიის და მექსიკის დიდ პრიზებს. მექსიკა რბოლის შენარჩუნებას აპირებს და ამ შემთხვევაში, რბოლების რიცხვი 22-ს მიაღწევს.

0.128081