ქართველი დიდოსტატი ბაადურ ჯობავა (2584) უდანაკარგოდ ირჯება არაბეთის გაერთიანებული ემირატების დედაქალაქ აბუ დაბიში მიმდინარე საერთაშორისო ფესტივალზე.

ჯობავას საკმაოდ წარმომადგენლობით ტურნირზე 26-ე განთესვა გააჩნია, თუმცა, მიჯრით მე-6 პარტია მოიგო და შეჯიბრს ერთპიროვნულად ლიდერობს.
დღეს, ბაადური მე-4 რეიტინგის მქონე ირანელ პარჰამ მაგჰსოოდლოს (2656) გაეჯიბრა და თეთრი ფიგურებით იმარჯვა. საინტერესოა, რომ ბლიცში ქართველი მოჭადრაკე სწორედ ირანელს ჩამორჩა და მე-2 ადგილი დაიკავა, ამდენად, გარკვეული რევანშის აღება მოახერხა.
აღსანიშნავია, რომ ჯობავამ უახლოეს მეტოქეებს, ასეთი კი სამნი არიან, უკვე ქულით გაუსწრო. საქართველოს ნაკრების ლიდერს 5.0-5.0 ქულით კვალში უზბეკი ნოდირბეკ იაკუბოევი (2574), ინდოელი მურალი კარტიკეიანი (2612) და ჩინელი ჰუა ნი (2668) უდგანან.
შეგახსენებთ, რომ ემირატებში მიმდინარე ტურნირზე კიდევ ერთი ქართველი მოჭადრაკე ლუკა პაიჭაძე (2570) ირჯება, რომელმაც დღეს შავი ფიგურებით ინდოელი სვამინატან სოუმია (2377) დაამარცხა და 4.0 ქულით მეთექვსმეტე-ოცდამეთექვსმეტე ადგილებს ინაწილებს, დამატებითი მაჩვენებლებითკი, ოცდამეთორმეტეა.
აბუ დაბის საჭადრაკო ფესტივალი 9 ტურად მიმდინარეობს და 10 აგვისტოს დასრულდება, მისი საპრიზო ფონდი კი ასე განაწილდება: I ადგილი – 13 000 დოლარი, II – 7 500, III – 5 500, IV – 3 500, V – 2 000, VI – 1 500, VII – 1 000, VIII – 800, IX – 700, X – 600.