დიეგო მარადონამ თავისი ნებით დატოვა მექსიკური „დორადოსის“ მთავარი მწვრთნელის პოსტი. მიზეზად ლეგენდარული არგენტინელის ჯანმრთელობა სახელდება. ის მხრის და მუხლის ოპერაციებს გაიკეთებს.

„მადლობა ყველაფრისთვის ბოს. გამოჯანმრთელდით და უახლოეს ხანში შევხვდებით!“ - წერია „დორადოსის“ ტვიტერზე.

58 წლის მარადონამ „დორადოსი“ შარშან 6 სექტემბერს ჩაიბარა. 11 თვიანი კონტრაქტი გააფორმა კლუბთან და ამ ხნის განმავლობაში 2 მილიონი დოლარი მიიღო. არგენტინელი სპეციალისტი ასევე კულიაკანური კლუბის ტექნიკური დირექტორის ფუნქციასაც ასრულებდა.

გუნდი აპერტურასა და კლაუსურას ფინალებში გავიყვანა, თუმცა ორივეჯერ „ატლეტიკო სან-ლუისთან“ დამარცხდა.