ფეხბურთი

21:28 | 30.05.2019 | ნანახია [] - ჯერ

სერხიო რამოსი: "მინდა კარიერა "რეალში" დავასრულო"

მადრიდის „რეალისა“ და სერხიო რამოსის ურთიერთობა გაგრძელდება. დააანონსებული ინფორმაცია, რომ ესპანელმა გუნდში დარჩენის გადაწყვეტილება მიიღო, დადასტურდა.

რამოსმა პრესკონფერენცია გამართა და საჯაროდ თქვა, რომ მადრიდიდან წასვლა არ უნდა. მეტიც, 33 წლის ფეხბურთელის განცხადებით, კარიერის „რეალში“ დასრულება მისი მიზანია.

„მინდა თამაში აქ გავაგრძელო, „რეალში“. გადავწყვიტე დიდი ხნით მადრიდში დარჩენა, რადგან წასვლა არ მინდა. ჩემი ოცნება ყოველთვის აქ დარჩენა იყო. პერესთან მამა-შვილური ურთიერთობა მაქვს და ეკონომიკურ საკითხებზე არასდროს გვისაუბრია. მინდა, რომ ამ გუნდთან ერთად ბევრი ტიტული მოვიგო.

დიახ, ჩინეთიდან წინადადება ნამდვილად იყო, მაგრამ მინდა ისევ „რეალის“ მაისური მეცვას. არცერთ მომენტში წასვლაზე არ მიფიქრია, ჩვენ პირად საკითხზე მართლაც ვისაუბრეთ, მაგრამ ეს დასრულებულია. ძალიან კმაყოფილი ვარ ჩემი კონტრაქტით, ხელფასით. მინდა, კარიერა აქ დავასრულო“, - თქვა რამოსმა.

შეგახსენებთ, სერხიო რამოსი „რეალის“ ღირსებას 2005 წლიდან მოყოლებული იცავს, ხოლო 2015 წლიდან გუნდის კაპიტანია. „სამეფო კლუბთან“ მოქმედი კონტრაქტი კი 2021 წლის 30 ივნისამდე აკავშირებს.

0.107883