ფეხბურთი

21:21 | 10.05.2019 | ნანახია [] - ჯერ

"ტორპედოს" გამარჯვება ლამაზი ფეხბურთით, ლამაზი გოლებით

საქართველოს კრისტალბეთ ეროვნული ლიგის მე-12 ტური თბილისში, „ლოკომოტივისა“ და ქუთაისის „ტორპედოს“ შეხვედრით დაიწყო.

საქართველოს ოთხგზის ჩემპიონმა მორიგი გამარჯვება საკმაოდ ადვილად და ეფექტური გოლებით მოახერხა. ქუთათურებმა საქმეს თავიდანვე ნაყოფიერად მოჰკიდეს ხელი და მე-14 წუთზე უკვე ორბურთიანი უპირატესობა მიიღეს. ჯერ იყო და ამბროსის ჩაჩუასა და ბუდუ ზივზივაძის ჩინებული კომბინაცია ნოდარ ქავთარაძემ დაასრულა გოლით. ზუსტად ორ წუთში კი ზივზივაძემ თავად გაიტანა - პენალტი პანენკას სტილში უნაკლოდ შეასრულა.

„ტორპედომ“ 62-ე წუთზე უპირატესობა კიდევ უფრო სოლიდური გახადა. ამჯერადაც ეფექტური და ჩინებული კომბინაცია ვიხილეთ, ქუსლები ფინტები - კარგი სანახაობა იყო. ზივზივაძის დარტყმული ცარიელი კარიდან კი გამოიტანეს მასპინძლებმა, მაგრამ რიჩარდ ლუკამ ლამაზი შეტევა შედეგიანად მაინც დაასრულა.

„რკინიგზელებმა“ დარჩენილ დროში მხოლოდ ის მოახერხეს, რომ თეიმურაზ შონიას გოლით ანგარიში დაასველეს და - 1:3. „ტორპედომ“ ამ გამარჯვებით 23 ქულა დააგროვა და მეორე ადგილზე მინიმუმ ხვალამდე აინაცვლა, ხოლო „ლოკომოტივი“ 9 ქულით ბოლოსწინა პოზიციაზე დარჩა.

„ლოკომოტივი“ – „ტორპედო“ 1:3 (0:2)

გოლები: 0:1 ქავთარაძე (12), 0:2 ზივზივაძე (14), 0:3 ლუკა (62), 1:3 შონია (81)

0.110571