ფეხბურთი

2:51 | 2.05.2019 | ნანახია [] - ჯერ

ლიონელ მესი - 600!

ლიონელ მესის 600 - კატალონიის „ბარსელონას“ რიგებში არგენტინელმა სუპერვარსკვლავმა საოცარ ნიშნულს უწია და მე-600 გოლი გაიტანა. ეს, „ლივერპულთან“ ჩემპიონთა ლიგის ნახევარფინალში მოხდა.

მესის ჩემპიონთა ლიგის ნახევარფინალში 2015 წლის შემდეგ არ ჰქონდა ნათამაშები, როდესაც ჟერომ ბოატენგს დამცინავად გაუსწორდა და მაშინ ამ ეპიზოდს დიდი გამოხმაურება მოჰყვა. მესიმ 4 წლის თავზე ინგლისურ „ლივერპულთან“ გაილაღა, დუბლი მიითვალა და „ბლაუგრანას“ მაისურით საიბულეო გოლი მიითვალა.

ლიონელმა „ბარსას“ მაისურით სადებიუტო გოლი ჯერ კიდევ 2005 წელს, „ალბასეტესთან“ გაიტანა და სულ რაღაც 14 წელი იკმარა, რომ მეტოქეები 600-ჯერ დაემწუხრებინა. საინტერესო დამთხვევაც: ლეომ "ალბასეტესთან" პირველი გოლი 1-ელ მაისს გაიტანა და 1-ელ მაისს გაიტანა მე-600 გოლიც, ოღონდ 14-წლიანი ინტერვალით.

აქვე ვთქვათ, რომ ლიონელს ჩემპიონთა ლიგაზე ყველაზე უკეთ ინგლისური გუნდების წინააღმდეგ გამოსდის თამაში, მაგრამ აქამდე „ლივერპულისთვის“ გოლი არასდროს გაეტანა. ახლა, მის მიერ გამწარებულ გუნდთა სიაში „წითლებიც“ ამაყად შედიან... ახლა მესის ინგლისური გუნდების კარში 33 მატჩში 26 გოლი აქვს გატანილი არცერთ ფეხბურთელს რომელიმე ქვეყნის წარმომადგენლები ამაზე მეტჯერ არ დაუმწუხრებია (იგივე მაჩვენებელი აქვს, 26 გოლი კრიშტიანუ რონალდუს გერმანული გუნდების წინააღმდეგ).

ბარემ, რახან მესისა და ინგლისელთა კავშირზე ვსაუბრობთ - ლიონელი ისტორიაში მეორე ფეხბურთელი გახდა, რომელმაც ერთ სეზონში სამი ინგლისური გუნდი დაამწუხრა ("ტოტენჰემი", "მანჩესტერი", "ლივერპული"). მანამდე, იგივე ტომას მიულერს ჰქონდა გაკეთებული 2013-2014 წლების სეზონში, როდესაც "არსენალს", "მანჩესტერ სიტისა" და "მანჩესტერ იუნაიტედს" გაუტანა.

"ლივერპული" ჩემპიონთა ლიგაზე 32-ე გუნდი გახდა, რომელსაც მესიმ გოლი გაუტანა. ამაზე მეტი მრავალფეროვნებით მხოლოდ რაული გამოირჩა, რომელმაც თავის დროზე ევროპის მთავარ საკლუბო ტურნირში 33 სხვა და სხვა გუნდის კარის აღება შეძლო.

და კიდევ, მე-600 გოლი სამხრეთ ამერიკელმა ჯარიმით გაიტანა. ჯარიმა, რომელიც 29 მეტრიდან დაარტყა და ეს მის კარიერაში ყველაზე შორი დისტანციიდან გატანილი გოლია სტანდარტული მდგომარეობით ჩემპიონთა ლიგის გათამაშებაში.

ცნობისთვის, მესის 600 გოლი „ბარსას“ მაისურით შემდეგნაირად ნაწილდება:

417 - ლა ლიგა

112 - ჩემპიონთა ლიგა

50 - ესპანეთის თასი

13 - ესპანეთის სუპერთასი

5 - მსოფლიოს საკლუბო ჩემპიონატი

3 - ევროპის სუპერთასი

Loading...
სტატისტიკა
0.26173