ქართველი მოჭადრაკე ზურაბ სტურუა (2531) ბერძნულ კუნძულ როდესზე გამართული სენიორთა ევროპის ჩემპიონატის გამარჯვებული გახდა.

სტურუამ 50+ ღია კატეგორიაში 9-დან 7.5 ქულა მოაგროვა და სერბ მილოშ პავლოვიჩთან ერთად პირველ-მეორე ადგილები გაინაწილა, დამატებითი მაჩვენებლებით კი, ოქროს მედალი ერგო. ამავე კატეგორიაში გიული ალიხანაშვილმა (1895) 4.0 ქულით 34-ე შედეგი დააფიქსირა.

65+ ქალბატონთა შეჯიბრში 6.0 ქულით მე-2 ადგილზე გავიდა თამარ ხმიადაშვილი (1976), ლეგენდარულმა ნონა გაფრინდაშვილმა (2294) კი 5.5 ქულა მიითვალა და ამჯერად, კვარცხლბეკს მიღმა დარჩა – მე-4 იყო.

65+ ღია კატეგორიაში ვარლამ ვეფხვიშვილმა 5.0 ქულით მე-17 საფეხური დაიკავა.