21 წლის ლუკა მაისურაძე (81 კგ.) რუსეთის ქალაქ ეკატერინბურგში მიმდინარე გრანდ სლემის ბრინჯაოს მედლის მფლობელი გახდა, რაც ახალგაზრდა ქართველი ძიუდოისტისთვის უდავოდ წარმატებად უნდა მივიჩნიოთ.

მნიშვნელოვანია ისიც, რომ მაისურაძემ ტატამზე ილეთების ნამდვილი კორიანტელი დააყენა და მე-3 ადგილისთვის შეხვედრაშიც გამოცდილი ჰოლანდიელი ფრანკ დე ვიტი ულამაზეს იპონზე დაანარცხა.
შეგახსენებთ, რომ ლუკა შეჯიბრში მე-2 წრიდან ჩაერთო, სადაც მოლდოველი კატალინ მარიანი ვაზარიზე 2-ჯერ დასცა, შემდეგ ვაზარითვე მონღოლი უუგანბაატარ ოტგონბაატარი დაჯაბნა, მეოთხედფინალის დამატებით დროში კი მტკივნეულ ილეთზე მოჰყვა ბელგიელ მატიას სისესთან. ამგვარად, მაისურაძე რეპეშაჟში გადაერთო, სადაც რუმინელ მარსელ გერჩეას ვაზარი აართვა.
ამგვარად, საქართველოს ნაკრებმა რუსულ გრანდ სლემზე უკვე მე-2 ბრინჯაოს მედალი მიითვალა და პირველ შემთხვევაშიც თავი ახალგაზრდა ძიუდოისტმა გამოიჩინა. 20 წლის ბაგრატ ნინიაშვილი კვარცხლბეკზე 66 კგ-მდე წონით კატეგორიაში ავიდა.
კვირას, 17 მარტს, ეკატერინბურგში პრიზიორთა ვინაობა ვაჟთა დარჩენილ სამ წონაში გაირკვევა. 90 კგ-ში, წლეულს, საერთაშორისო ასპარეზზე პირველად ვიხილავთ ბექა ღვინიაშვილს. მისი მოწინააღმდეგე რუსი ჯაფარ კოსტოევი იქნება. უშანგი მარგიანი მე-2 წრეშია დაშვებული და რუს იზმაილ ხამხოევსა და უზბეკ შახზოდბეკ საბიროვს შორის უმჯობესს ელის.
2 წარმომადგენელი გვყავს 100 კგ-მდე წონით კატეგორიაშიც: ონისე სანებლიძე ბულგარელ დანიელ დიჩევს შეერკინება, ხოლო გიორგი ბერიაშვილის მოწინააღმდეგე ლიტველი კაროლის ბაუზა გახლავთ.
დასასრულ, მძიმე წონაზეც (+100 კგ.) ვთქვათ, სადაც საქართველოს ღირსებას გელა ზაალიშვილი დაიცავს. ახალგაზრდა ძიუდოისტი პირველივე რაუნდში იაპონელ ჰიოგა ოტას დაუპირისპირდება.