საუკეთესო სეზონი არც „ბეშიქთაშს“ აქვს და არც „ფენერბახჩეს“. „არწივები“ მესამე ადგილზე არიან და ჩემპიონობის შანსი თითქმის დაკარგული აქვთ (-11 ქულა ლიდერ „ბაშაკშეჰირთან“), ხოლო „ფენერი“ ჩემპიონობას ვინ ჩივის, გადარჩენისთვის იბრძვის - მე-14 ადგილზეა და გასავარდნ ზონას კინკილა ქულითაა მოშორებული.

თუმცა, სტამბოლურ დერბს განსაკუთრებული ეშხი ყოველთვის თან დევს და ასე იყო დღესაც. „ვოდაფონ არენაზე“ ფეხბურთის გურმანებმა ჩინებული მატჩი იხილეს - ბევრი გოლი, დრამატიზმი, დაძაბული, კინკლაობა - მოკლედ, ყველაფერი ის, რასაც დერბიდან უნდა ველოდოთ.

შენოლ გიუნეშის „ბეშიქთაშმა“ პირველი ტაიმი ბრწყინვალედ ჩაატარა და ფავორიტის სტატუსი გაამართლა. გოქან გონულის გოლს ბურაქ ილმაზმა დუბლი დაამატა და ანტრაქტამდე თითქოს ყველაფერი გადაწყდა. თუმცა, ვინც ჩათვალა, რომ „ფენერმა“ მორიგი უფერული მატჩი ჩაატარა და დამარცხდა, აჩქრადა, შეცდა.

მეორე ნახევარში ყველაფერი თავდაყირა დადგა. ერსუნ იანალის გუნდმა 12-წუთიან ინტერვალში (55-დან 67-მდე) სამჯერ გაუტანა ლორის კარიუსს. ჯერ მიჰა ზაიჩმა, მერე სადიქ ჩიფტპინარმა და ბოლოს ჰასალ ალი კალდირიმმა „ფენერბახჩე“ მარცხისგან იხსნეს და სტამბოლში მაგარი საფეხბურთო დრამაც შეიქმნა.