ინგლისის კარაბაოს თასის ფინალში "მანჩესტერ სიტიმ" ლონდონის "ჩელსი" პენალტების სერიაში დაამარცხა და მიმდინარე სეზონში პირველი ტიტული მოიპოვა.
დამატებითი დროის მიწურულს, "არისტოკრატთა" თავკაც მაურიციო სარის მეკარე კეპა არიზაბალაგას შეცვლა და მოედანზე ვილი კაბალიეროს შეყვანა სურდა. ალბათ, იტალიელი ფიქრობდა, რომ ვეტერანი არგენტინელი პენალტების სერიაში უფრო საიმედო იქნებოდა. თუმცა, სარის განზრახვას შესრულება არ ეწერა.
24 წლის კეპამ მთავარ მწვრთნელს არ დაუჯერა და მოედანი არაფრის დიდებით არ დატოვა. საბოლოოდ, ესპანელმა კიპერმა თავისი გაიტანა და თამაში გააგრძელა. სხვათა შორის, პენალტების სერიაში არიზაბალაგამ ლეროი სანეს დარტყმა მოიგერია, თუმცა გამარჯვება მაინც მეტოქეს დარჩა (4:3).
აღსანიშნავია, რომ ნამატჩევს სარიმ პრესკონფერენციაზე მომხდარზე კომენტარი გააკეთა. იტალიელის განცხადებით, ეს დიდი გაუგებრობა იყო, რადგან ეგონა, რომ კეპას ტრავმა ჰქონდა. სარის თქმით, ახლა მთავარია, ამ საკითხზე თავად კეპას გაესაუბროს.
