უნაი ემერის “არსენალის” მთავარი მწვრთნელის პოსტზე უიღბლო დებიუტი გამოუვიდა. მისი გაწვრთნილი გუნდი საკუთარ მოედანზე მოქმედ ჩემპიონს, “მანჩესტერ სიტის” დაუხვდა და ორი უპასუხო ბურთი გაუშვა.

“ქალაქელები” ორივე ტაიმში უკეთესები იყვნენ და 3 ქულა სრულიად დამსახურებულად მოიპოვეს. ძალიან კარგი შეხვედრა ჩაატარა პეტრ ჩეხმა, რომელმაც რამდენიმე რთული ბურთი მოიგერია და მისი საიმედო თამაში რომ არა, სხვაობა უფრო დიდი იქნებოდა. ჩეხმა კიპერმა მთლიანობაში ექვსი სეივი გააკეთა. “სიტის” მაისურით პირველი გოლის გატანასთან ახლოს იყო რიად მაჰრეზი, რომელსაც მიზნამდე სიზუსტე სულ ოდნავ დააკლდა. სახიფათო მომენტები “არსენალსაც” ჰქონდა, თუმცა გაცილებით ნაკლები, ვიდრე მეტოქეს და ლოგიკურია, რომ სტუმრებმა იმარჯვეს.

ანგარიში მე-14 წუთზე რაჰიმ სტერლინგის შესანიშნავი თამაშის შემდეგ გაიხსნა: მან ფლანგიდან ცენტრისკენ შეიწია, გზად ორი მოწინააღმდეგე ჩამოიშორა და საჯარიმოს მისადგომებიდან ჩეხს აუღებელი დაურტყა. მეორე ბურთი კი 64-ე წუთზე გავიდა, უმეთვალყურეოდ დარჩენილმა ბერნარდო სილვამ 13-14 მეტრიდან უძლიერესად დაარტყა და ჩეხს შანსი არ დაუტოვა. აღსანიშნავია, რომ ორივე საგოლე გადაცემა ბენჟამინ მენდიმ მიითვალა – 0:2.

გათამაშება მშვენივრად დაიწყო “ლივერპულმა”, რომელიც “ენფილდ როუდზე” “ვესტ ჰემს” დაუხვდა და ოთხბურთიანი სხვაობით გაანადგურა. პირველი ბურთი მოჰამედ სალაჰმა მე-19 წუთზე გაიტანა, რომელიც რობერტსონის მიერ კარის გასწვრივ გაკეთებულ გადაცემას გამოეხმაურა და ცარიელ კარში შეაგდო. ტაიმის დამატებულ წუთზე კი უკვე ჯეიმს მილნერმა გაატანინა სადიო მანეს ცარიელ კარში. 53-ე წუთზე მანემ დუბლი გაიფორმა, თუმცა უნდა ითქვას, რომ ფირმინოს პასის დროს თამაშგარე მდგომარეობაში იმყოფებოდა და გოლი არ უნდა ჩათვლილი. “ჩაქუჩების” რბევას წერტილი 88-ე წუთზე დაესვა: მოედანზე ერთი წუთით ადრე გამოსულმა დანიელ სტარიჯმა ახლო მანძილიდან შეაგდო – 4:0.

“საუთჰემპტონის” და “ბარნლის” დაპირისპირება გატანილი გოლების გარეშე დასრულდა.

ლივერპული – ვესტ ჰემი 4:0 (2:0)

გოლები: 1:0 სალაჰი (19), 2:0, 3:0 მანე (45+2; 53), 4:0 სტარიჯი (88)

არსენალი – მანჩესტერ სიტი 0:2 (0:1)

გოლები: 0:1 სტერლინგი (14), 0:2 ბ.სილვა (64)

საუთჰემპტონი – ბარნლი 0:0