ფესტივალ „ზაფხულის ფერების“ ფარგლებში დაბა ქობულეთში 43-ე მსოფლიო საჭადრაკო ოლიმპიადისადმი მიძღვნილი ღონისძიება ჩატარდა: ცენტრალური პარკის მიმდებარედ მოწყობილ არაერთ თემატურ პავილიონს შორის გამორჩეული ადგილი ეკავა საჭადრაკო ოლიმპიადასთან დაკავშირებით მოწყობილ კუთხეს.

ოლიმპიადის ბანერი, დროშები, საინფორმაციო დაფა და საჭადრაკო ატრიბუტიკა - ამ ყველაფერმა დამსვენებელთა ყურადღება მიიპყრო, ოლიმპიადის საორგანიზაციო კომიტეტმა კი მათ ბათუმი 2018-ის შესახებ ამომწურავი ინფორმაცია მიაწოდა.

ყველაზე პოპულარული ოლიმპიადის თილისმა კუ „ბათუსა“ იყო, რომელმაც გიგანტურ საჭადრაკო დაფასთან ბავშვებს უმასპინძლა, შემდეგ კი ყველა მსურველთან სამახსოვრო ფოტო გადაიღო.

„ზაფხულის ფერების“ ეგიდით ერთდროული თამაშის სეანსიც მოეწყო - მოყვარულმა მოჭადრაკეებმა დიდოსტატ მირანდა მიქაძესთან მოსინჯეს ძალები.

„ძალიან კარგია, რომ წინასაოლიმპიადო განწყობა უკვე ქობულეთშიც იგრძნობა. ჩვენ კიდევ არაერთ საინტერესო ღონისძიებას ვგეგმავთ და დარწმუნებული ვარ, საჭადრაკო ოლიმპიადა ჩვენი ქვეყნის თითოეული მოქალაქისთვის და სტუმრისთვის ნამდვილი ზეიმი იქნება“, - განაცხადა ფიდე-ს კონსულტანტმა სოფიო ბაკურიძემ.

ბათუმი 43-ე მსოფლიო საჭადრაკო ოლიმპიადას 23 სექტემბრიდან 5 ოქტომბრის ჩათვლით უმასპინძლებს. სპეციალურად ოლიმპიადისთვის საქართველოს 189 ქვეყნის 4 ათასამდე სტუმარი ეწვევა.

2018 წლის მსოფლიო საჭადრაკო ოლიმპიადის საორგანიზაციო კომიტეტი