იტალიური “მილანის” მთავარი მწვრთნელის პოსტზე "ნაპოლის" თავკაცის მაურისიო სარის კანდიდატურას განიხილავენ. ჭორები ამის შესახებ მას მერე გავრცელდა, რაც “როსონერი” იტალიის თასის ფინალში “იუვენტუსთან” დიდი ანგარიშით (0:4) დამარცხდა.
Gazzetta dello Sport-ის ინფორმაციით, მიუხედავად იმისა, რომ შავ-წითლებმა სულ ახლახანს გაუხანგრძლივეს კონტრაქტი ახალგაზრდა მწვრთნელ ჯენარო გატუზოს, თუ კლუბი ევროსარბიელზე გასვლას ვერ მოახერხებს, კონტრაქტი შეწყდება.
შეგახსენებთ, რომ ჩემპიონატის დასრულებამდე 2 ტურით ადრე “მილანი” 60 ქულით მე-6 პოზიციაზე იმყოფება, რომელიც ევროპა ლიგის საგზურს სრულიად აკმაყოფილებს, თუმცა მათ მხოლოდ 1 ქულით ჩამორჩება “ატალანტა”, “ფიორენტინას” კი 57 ქულა აქვს.
აღსანიშნავია ისიც, რომ დარჩენილ ორ ტურში ჯენარო გატუზოს გუნდი უშუალო კონკურენტებს – “ატალანტას” სტუმრად, ხოლო “ფიორენტინას” შინ დაუპირისპირდება.
