თითო ოქროსა და ვერცხლის და ოთხი ბრინჯაოს მედლით დაასრულა საქართველოს ბერძნულ-რომაული სტილით მოჭიდავეთა ნაკრებმა ევროპის 2018 წლის ჩემპიონატი. რუსეთის ქალაქ კასპიისკში მიმდინარე ევროპირველობის მესამე დღეს ჩემპიონ-პრიზიორები დარჩენილ ხუთ წონით კატეგორიაში გამოვლინდნენ. ევროკონკურენციაში ხუთი ქართველიც ჩაება და სამი მათგანი პოდიუმზეც ავიდა.
67 კილოგრამ წონით კატეგორიაში მოჭიდავე შმაგი ბოლქვაძეს უმაღლეს საფეხურამდე გადამწყვეტი გამარჯვება დააკლდა - ოლიმპიური თამაშების ბრინჯაოს პრიზიორმა ფინალში რუს არტემ სურკოვთან წააგო და ვერცხლის მედალს დაეუფლა. დავით ჩხარტიშვილმა (60 კგ) და იური ლომაძემ (72 კგ) კი მესამე საპრიზო ადგილები დაიკავეს. ჩხარტიშვილმა რეპეშაჟის ფინალში გერმანელ ეტიენ კინსინგერს აჯობა, ხოლო ლომაძემ – მოლდოველ დანიელ კატარაგას.
