ტურინის “იუვენტუსის” მეკარე ჯანლუიჯი ბუფონი თავის მომავალთან დაკაშვირებით კომენტარს აკეთებს. იტალიელი ფეხბურთელის განცხადებით, მანამდე ითამაშებს, სანამ მოტივაცია ექნება.
“მოტივაცია ყველაფერია. სანამ, ბრძოლის ჟინი მექნება, თამაშს გავაგრძელებ. ხელმძღვანელობასთან ერთად უნდა გადავწყვიტო ყველაფერი, რამდენად შემრჩა ენერგია. გავაგრძელო თუ არა თამაში”, - განაცხადა ბუფონმა.
იტალიელი მეკარის აგენტი სილვანო მარტინა კი ამბობს, რომ ჯიჯი კარიერას “იუვენტუსში” დაასრულებს, თუმცა, როდის, ეს უცნობია:
“ჯიჯი კარიერას აუცილებლად “იუვენტუსში” დაასრულებს. “ჯენოაში” გადასვლა გამორიცხულია”, - თქვა მარტინამ.
საგულისხმოა, რომ ჯანლუიჯი ბუფონი “ჯენოას” გულშემატკივარია და დაახლოებით 10 წლის წინ განაცხადა, რომ კარიერის ბოლოს 1 სეზონს გენუური გუნდის ღირსებას გასამრჯელოს გარეშეც დაიცავდა.
შეგახსენებთ, რომ ბუფონს “იუვენტუსთან” კონტრაქტი მიმდინარე სეზონის ბოლოს ეწურება. ჯერჯერობით უცნობია, გააგრძელებს თუ არა საფეხბურთო კარიერას 21-ე საუკუნის საუკეთესო მეკარე.
