უეფას ჩემპიონთა ლიგის მეექვსე ტურის შემდეგ WORLDSPORT.GE წარმოგიდგენთ, ტურს ციფრებში. საინტერესო ფაქტები, მიღწევები, რეკორდები და სტატისტიკური მონაცემები.

მაშ ასე, ჩემპიონთა ლიგის მეექვსე ტური ერთ გვერდზე:

6 – კრიშტიანუ რონალდუ გახდა პირველი ფეხბურთელი, რომელმაც ჩემპიონთა ლიგის ჯგუფურ ეტაპზე ზედიზედ 6 შეხვედრაში შეძლო გოლის გატანა.

11 – “ნაპოლიმ” ევროთასებზე ზედიზედ 11 საგარეო მატჩში შეძლო გოლის გატანა და ეს საუკეთესო შედეგია ნეაპოლელთა ისტორიაში.

2 – “დორტმუნდი” გახდა პირველი გუნდი, რომელმაც ჯგუფურ ეტაპზე მესამე ადგილი მხოლოდ და მხოლოდ 2 ქულით დაიკავა.

5 – პიერ-ემერიკ ობამეიანგმა ჩემპიონთა ლიგაზე 15 გოლიდან 5 “რეალს” გაუტანა. გაბონელს უფრო მეტი არცერთი სხვა გუნდის კარში არ აქვს გატანილი (ჩემპიონთა ლიგაზე).

306 – ჩემპიონთა ლიგის ჯგუფურ ეტაპზე 306 გოლი გავიდა და ეს ტურნირზე ჯგუფური ეტაპისთვის ყველა დროის რეკორდია.

15 – “მონაკომ” ჯგუფურ ეტაპზე 15 გოლი გაუშვა. ფრანგულ გუნდებს ჯგუფურ ეტაპზე ამდენი გოლი არასდროს გაუშვიათ.

2005 – რიჩარდ გეძალი გახდა “მონაკოს” პირველი ფეხბურთელი 2005 წლის შემდეგ, რომელიც ჩემპიონთა ლიგაზე გააძევეს. ბოლოს “თავადების” ფეხბურთელს წითელი ბარათი 2005 წლის 9 მარტს, პსვ-სთან შეხვედრაში უჩვენეს. კერძოდ, გაელ ჟივეს.

2 – კრიშტიანუ რონალდუს ორი სხვადასხვა სახე: ჩემპიონთა ლიგაზე 21 კარში დარტყმა და 9 გოლი, ლა ლიგაში 21 კარში დარტყმა და 2 გოლი.

3 – ფილიპე კოუტინიომ “ლივერპულის” მაისურით ჰეთ-თრიქი პირველად შეასრულა.

1 – ფერნანდო ლორენტემ “ტოტენჰემის” რიგებში სადებიუტო გოლი გაიტანა (17 თამაშში).

4 – 2006-2007 წლების სეზონიდან მოყოლებული პირველად მოხდა, რომ ჯგუფურ ეტაპზე ოთხი ინგლისური გუნდი პირველ ადგილზე გავიდა.

5 – ინგლისი გახდა პირველი ქვეყანა, რომელიც ჩემპიონთა ლიგის პლეი-ოფში ხუთი გუნდით იქნება წარმოდგენილი.

18 – მოჰამედ სალაჰს ყველა ტურნირის ჩათვლით ყველაზე მეტი გოლი აქვს გატანილი პრემიერლიგაში მოთამაშე ფეხბურთელებს შორის (18).

23 – “ლივერპულმა” ჩემპიონთა ლიგის ჯგუფურ ეტაპზე 23 გოლი გაიტანა. ეს ინგლისურ გუნდებს შორის სარეკორდო მაჩვენებელია.

1470 – ალვარო ნეგრედომ ჩემპიონთა ლიგაზე 1470 დღის შემდეგ გაიტანა გოლი. ესპანელს ბოლოს “სიტისა” და “პლზენის” მატჩში გაეტანა (2013 წლის 27 ნოემბერს).

23 – ფერნანდო ლორენტემ ჩემპიონთა ლიგის ერთ შეხვედრაში გოლი და საგოლე პასი კარიერაში პირველად მიითვალა (23 შეხვედრა ლიგაზე).

03:51 – ფილიპე კოუტინიოს პენალტი “ლივერპულისთვის” ჩემპიონთა ლიგაზე, კერძოდ, “ენფილდ როუდზე” გატანილი ყველაზე სწრაფი გოლია.

17 – ფილ ფოდენი “მანჩესტერ სიტის” ისტორიაში ყველაზე ახალგაზრდა ფეხბურთელი გახდა, რომელიც ჩემპიონთა ლიგის მატჩში სასტარტო შემადგენლობაში ყოფილა (17 წლისა და 191 დღის).

100 – პეპ გვარდიოლამ ჩემპიონთა ლიგაზე მეასე მატჩი ჩაატარა მწვრთნელის რანგში. მასზე უკეთესი შედეგი მხოლოდ სერ ალექს ფერგიუსონს, არსენ ვენგერს, კარლო ანჩელოტის, ჟოზე მოურინიოსა და მირჩა ლუჩესკუს გააჩნიათ.

1 – მადრიდის “ატლეტიკო” ჩემპიონთა ლიგის ჯგუფიდან 2009-2010 წლების სეზონის შემდეგ პირველად ვერ გავიდა. მაშინ, “როხიბლანკომ” ევროპა ლიგაზე გადაინაცვლა და საბოლოოდ ტურნირი მოიგო.

40 – “მანჩესტერს” საკუთარ მოედანზე (ყველა ტურნირის ჩათვლით) უკვე 40 თამაშია არ წაუგია და პირად რეკორდამდე ერთი წაუგებელი შეხვედრა აშორებს.

10 – კილიან მბაპემ ჩემპიონთა ლიგაზე 10 გოლის გატანა (15 თამაშში) ყველაზე ახალგაზრდულ ასაკში შეძლო. აქვე, საუკეთესო ხუთეულიც:

მპაბე – 18 წელი, 11 თვე, 15 დღე

ბენზემა – 20 წელი, 10 თვე, 2 დღე

სავიოლა – 21 წელი, 3 თვე, 0 დღე

მესი – 21 წელი, 3 თვე, 7 დღე

რაული – 21 წელი, 3 თვე, 24 დღე

რუნი – 22 წელი, 0 თვე, 14 დღე

6 – პოლ პოგბამ ყველა ტურნირის ჩათვლით ბოლო 12 მატჩში მეექვსე საგოლე პასი გააკეთა. ეს იმაზე მაღალი მაჩვენებელია, ვიდრე მანამდე ჩატარებულ 51 თამაშში ჰქონდა.

390 – საულ ნიგეზის გოლი “ჩელსის” კარში იყო “ატლეტიკოსთვის” პირველი გოლი ჩემპიონთა ლიგის გასვლით მატჩში. ბოლოს მადრიდელებმა აპრილში “ლესტერი” დაამწუხრეს მისსავე მოედანზე (390 წუთი).

2 – “მანჩესტერმა” ჩემპიონთა ლიგასა და ინგლისის ლიგის თასზე ჩატარებულ 4 საშინაო მატჩში უფრო მეტი გოლი გაუშვა, ვიდრე პრემიერლიგის 7 საშინაო შეხვედრაში.

11 – “ბარსელონამ” ზედიზედ 11 სეზონის განმავლობაში ჩემპიონთა ლიგის ჯგუფური ეტაპი პირველი ადგილით დაასრულა.

6 – “ბარსელონას” საუკეთესო ბომბარდირი მიმდინარე სეზონში ლეო მესია (17 გოლი). საინტერესოა, რომ მეორე ადგილზე ამ მხრივ, მეტოქე ფეხბურთელები არიან ავტოგოლებით (6).

8 – 2015-2016 წლების სეზონიდან მოყოლებული საულ ნიგეზს ესპანელ ფეხბურთელებს შორის ყველაზე მეტი გოლი აქვს გატანილი ჩემპიონთა ლიგაზე (8).

4 – “იუვენტუსმა” ჩემპიონთა ლიგის პლეი-ოფში გასვლა ზედიზედ მეოთხედ მოახერხა.

2 – “რომამ” ჩემპიონთა ლიგის ჯგუფური ეტაპზე პირველი ადგილი მეორედ დაიკავა. პირველად 2008-2009 წლების სეზონში გააკეთა და მაშინაც, უკან “ჩელსი” მოიტოვა.

25 – პაულო დიბალას მიმდინარე სეზონში 25 საგოლე შანსი ჰქონდა, მაგრამ გოლი არ გაუტანია. ეს ყველაზე ცუდი მაჩვენებელია ჩემპიონთა ლიგაზე.

1 – კორენტინ ტოლისო გახდა პირველი ფრანგი ფეხბურთელი, რომელმაც პსჟ-ს ჩემპიონთა ლიგაზე ორი გოლი გაუტანა.

2014 – “პარი სენ ჟერმენმა” ზედიზედ ორი თამაში (“სტრასბურგთან” და “ბაიერნთან”) 2014 წლის დეკემბრის შემდეგ პირველად წააგო (“ბარსელონასთან” და “გენგამთან”).

1 – 2017 წლის მარტის შემდეგ (“ბარსელონა”) პსჟ-მ პირველი ტაიმი ორი ბურთის სხვაობით პირველად წააგო.

3 – კორენტინ ტოლისომ “ბაიერნის” ბოლო 4 გოლიდან სამში უშუალო მონაწილეობა მიიღო ჩემპიონთა ლიგაზე (2 გოლი, 1 პასი).

63 - “ბაიერნმა” “ალიანც არენაზე” ზედიზედ 63 შეხვედრაში მოახერხა გოლის გატანა. კლუბის ისტორიაში ამაზე უკეთესი სერია კი მხოლოდ 77 თამაშია (1979 წლიდან 1982 წლამდე).