საქართველოს ბერძნულ-რომაული და თავისუფალი სტილით მოჭიდავეთა ნაკრებების მთავარმა მწვრთნელებმა მსოფლიოს ჩემპიონატზე დასაყენებელი შემადგენლობები დაასახელეს. 2017 წლის სეზონის უმთავრეს შეჯიბრებას 21-26 აგვისტოს პარიზი უმასპინძლებს. პირველ ორ დღეს საპრიზო სამეულები ბერძნულ-რომაულში შეივსება. შემდეგ, ორი დღით ხალიჩები ქალებს დაეთმობათ. 25-26 აგვისტოს კი მსოფლიოს ჩემპიონ-პრიზიორებს თავისუფალი სტილით მოჭიდავეები გამოავლენენ.
ფრანგული განაცხადი ორივე ნაკრების თავკაცმა ძირითადად, თბილისის საერთაშორისო ტურნირის – კარტოზია-ბალავაძის მემორიალის შედეგების გათვალისწინებით შეავსო. თავისუფალთა დამრიგებელმა გიორგი იანტბელიძემ არჩევანი ოთხ წონით კატეგორიაში გააკეთა. დარჩენილ ოთხში კი ევროპის წლევანდელი ჩემპიონატის მედალოსნებს: ბექა ლომთაძეს (57 კგ), ვლადიმერ ხინჩეგაშვილს (61 კგ), ზურაბ იაკობიშვილსა (65 კგ) და გენო პეტრიაშვილს (125 კგ) ადრიანადვე დაუბევა ადგილი.
ბერძენ-რომაელთა დამრიგებელმა ბექა როყვა კი საფრანგეთში ნაკრების ყველაზე გამოცდილ და ტიტულოვან წევრს – ზურაბ დათუნაშვილსაც იახლებს, რომლის მსოფლიოს ჩემპიონატზე გამოსვლაც ერთხანს კითხვის ნიშნის ქვეშ იდგა.
ოლიმპიური თამაშების ბრინჯაოს პრიზიორი შმაგი ბოლქვაძე კი ამჯერად ერთი წონითი კატეგორიით მაღლა – 71 კილოგრამში იჭიდავებს.
საქართველოს ნაკრები
ბერძნულ-რომაული
59 კგ - ლაშა მარიამიძე
66 კგ - გოგა გოგიბერაშვილი
71 კგ - შმაგი ბოლქვაძე
75 კგ - მინდია წულუკიძე
80 კგ - ზურაბ დათუნაშვილი
85 კგ - რობერტ კობლიაშვილი
98 კგ - რევაზ ნადარეიშვილი
130 კგ - ლევან არაბული
თავისუფალი
57 კგ - ბექა ლომთაძე
61 კგ - ვლადიმერ ხინჩეგაშვილი
65 კგ - ზურაბ იაკობიშვილი
70 კგ - ზურაბ ერბოწონაშვილი
74 კგ - ჯუმბერ ყველაშვილი
86 კგ - დავით ხუციშვილი
97 კგ - ელიზბარ ოდიკაძე
125 კგ - გენო პეტრიაშვილი
