ბუნდესლიგის კლუბ "ვოლფსბურგის" სპორტულმა დირექტორმა კლაუს ალოფსმა განაცხადა, რომ გერმანიის ეროვნული ნაკრების ფეხბურთელი იულიან დრაქსლერი გუნდს არ დატოვებს, ხოლო ანდრე შურლეს მომავალი ჯერჯერობით გაურკვეველია.
"დრაქსლერის სიტუაცია ნათელია და იგი 100%-ით ჩვენ გუნდში დარჩება, ამის შესახებ კლუბში განხილვაც კი არ გვაქვს." - განუცხადა sport1.de-ს ალოფსმა.
"მგლებმა" დრაქსლერი "შალკედან" 2015 წლის ზაფხულში დაიმატეს და გერმანელმა გასულ სეზონში 31 მატჩში თავი 8-8 გოლითა და საგოლე გადაცემით გამოიჩინა.
შურლეს რაც შეეხება, ის "ჩელსიდან" გერმანულ გუნდს 2015 წლის თებერვალში შეუერთდა, გასულ სეზონში 41 შეხვედრაში 12 გოლი გაიტანა და თანაგუნდელებს 7-ჯერ გამოაჩენინა თავი. გერმანული მედიის ინფორმაციით, შურლე "დორტმუნდში" უახლოეს დღეებში გადავა.
