სხვა

13:01 | 16.05.2016 | ნანახია [] - ჯერ

სანდრო ბაზაძე მსოფლიო თასის ვიცე-ჩემპიონია

რიოს ოლიმპიადის ლიცენზიანტი სანდრო ბაზაძე დამოუკიდებელი საქართველოს ისტორიაში პირველი მოფარიკავეა, რომელიც მსოფლიო თასის ვიცე-ჩემპიონი გახდა.

ასეთი მაღალი რანგის ტურნირზე, მსოფლიოს უძლიერეს მოხმალავეებთან ბრძოლაში ვერცხლის ჯილდოს მოპოვება ნიჭიერი ქართველი სპორტსმენის დიდ პოტენციალზე მეტყველებს.

14 მაისს, მადრიდში მიმდინარე მსოფლიო თასზე სანდრომ ჯგუფურ ეტაპზე ექვსიდან ექვსივე მოწინააღმდეგე დაამარცხა და 64 საუკეთესო მოფარიკავეს შორის მოხვდა, რომლებმაც თასისთვის ბრძოლა გააგრძელეს, ახლა უკვე – ოლიმპიური სისტემით.

ბაზაძემ 15:12 დაამარცხა მსოფლიო ჩემპიონატის პრიზიორი, ეგვიპტელი მუჰამერ ამერი, მერე დიდი უპირატესობით – 15:8 მოუგო იტალიელ მსოფლიოს ჩემპიონს ფრანჩესკო ბონსანტოს, მერვედფინალში კი გზიდან ჩამოიცილა გუნდურ ჩათვლაში ლონდონის ოლიმპიური თამაშების პრიზიორი, რუმინელი ტიბერიუ დოლნიჩეაუ – 15:12.

სანდროს არანაკლებ გამოცდილი და ტიტულიანი მეტოქეები ჰყავდა მოთხედფინალურ და ნახევარფინალურ შეხვედრებში იტალიელების – ლონდონის ოლიმპიადის ვერცხლის პრიზიორის დიეგო ოჩიუზის და მსოფლიოს ჩემპიონის ლუკა კურატოლის სახით. ჩვენმა მოფარიკავემ ორივეს დამაჯერებლად სძლია, ფინალური შეხვედრა კი ფრანგ ვინსენტ ანსტეტთან დათმო – 9:15.

www.geonoc.org.ge

0.148469