საფრანგეთის მეორე ელიტარულ დივიზიონ პრო დ2-ში, საახალწლო შესვენების შემდეგ თამაშები მე-14 ტურით განახლდა და ორი ცენტრალური შეხვედრა გაიმართა. ერთ მათგანში ქართველ ლეგიონერებს არ უთამაშიათ, მეორეში კი, ოთხმა ჩვენებურმა მიიღო მონაწილეობა.
ერთპიროვნულმა ლიდერმა, ზაზა ნავროზაშვილის “ლიონმა” სეზონის მეორე მარცხი განიცადა. მისი 6-მატჩიანი მოგებათა სერია დიმიტრი ბასილაიასა და გიორგი მჭედლიშვილის “პერპინიანმა” შეწყვიტა, რომელსაც ბოლო დროს საქმეები ცუდად მისდიოდა. უკანასკნელ 8 შეხვედრას თუ გადავხედავთ, ეს ამ გუნდის მხოლოდ მეორე მოგებაა, მაგრამ ორივე შემთხვევაში “პერპინიანმა” უშუალო კონკურენტებს სძლია. “ლიონმა” მასპინძლებს 74-ე წუთზე ლელო გაუტანა, გარდასახვა გამოიყენა და 16:13 დაწინაურდა, უკვე გაწითლებულ დროზე “პერპინიანმა” თავისი მეორე ლელო გაიტანა და საბოლოოდ 20:16 იმარჯვა. ქართველი ლეგიონერები განაცხადში არ იყვნენ.
ტურის კიდევ ერთ ცენტრალურ შეხვედრაში ანტონ ფეიქრიშვილის “ბეიონმა” ლევან დათუნაშვილის, მერაბ შარიქაძის, ნიკოლოზ ხატიაშვილისა და გიორგი შარაშიძის “ორიაკს” 13:12 სძლია. სტუმართა შორის სასტარტო შემადგენლობაში იყვნენ შარიქაძე, დათუნაშვილი და ხატიაშვილი, პირველმა ორმა სრულად ითამაშა, ხოლო ხატიაშვილი 50-ე წუთზე შეცვალეს. შეცვლაზე დასკვნითი 10 წუთი ითამაშა ფეიქრიშვილმა. “ორიაკმა” პირველ ტაიმში 3 ჯარიმა გაიტანა და შესვენებაზე მნიშვნელოვანი უპირატესობით გავიდოდა, მაგრამ ზედ სასტვენის წინ კაცნაკლული შერკინებაში ვერ დადგა, საჯარიმო ლელოთი დაისაჯა და 9:10 ჩამორჩა. მეორე ტაიმში მეტოქეებმა თითო-თითო ჯარიმა გაცვალეს და “ბეიონმაც” პოზიციები გაიმყარა.
მოწინავე ხუთეულშია ლაშა ლომიძის “ბეზიე”, რომელმაც “მონტობანს” 38:17 სძლია და პრემიალური ქულაც აართვა. ლომიძემ შეცვლაზე 56-ე წუთიდან ითამაშა და მისმა გუნდმა ამ 24 წუთში 6-იდან 2 ლელო გაიტანა, რითაც პრემიალური ქულა გაინაღდა. ტაიმი 19:17 დასრულდა და “ბეზიემ” მონაგარს მეორე ტაიმშიც 19 ქულა შემატა, მაგრამ ამჯერად შეცდომებიც აღარ დაუშვა და საკუთარი ჩათვლის მოედანი და კარი ხელუხლებელი შეინახა.
ახალგაზრდა ბექა გორგაძე მყარად დამკვიდრდა “მონ-დე-მარსანის” შემადგენლობაში. მას პირველი გუნდის შემადგენლობაში დებიუტი ორიოდე ტურის წინ ჰქონდა და მაშინ შეცვლაზე ითამაშა, აგერ უკვე ორი მატჩია კი, სასტარტო შემადგენლობაშია და შეუცვლელად ირჯება. მე-14 ტურში მისმა გუნდმა გიორგი ზაქაშვილის “ექს-ან-პროვანსს” უმასპინძლა და 20:18 დაამარცხა. ზაქაშვილი ასევე სასტარტო შემადგენლობაში იყო და მოედანზე 70 წუთი გაატარა. მოლში მისმა აქტიურობამ 56-ე წუთზე სტუმრებს ლელო მოუტანა და მერე ჯარიმით სხვაობა 2 ქულამდე დავიდა (11:13). 73-ე წუთზე “მონ-დე-მარსანმა” თავისი მეორე ლელო გაიტანა და გარდასახვით გამარჯვება დაიბევა, სულ ბოლოს კი, საჯარიმო ლელოთი დაისაჯა და ქულა “ექს-ან-პროვანსსაც” შეხვდა.
გიორგი ნემსაძის, ირაკლი მირცხულავასა და კახაბერ კობერიძის “ტარბი” “კოლომიეს” ეწვია და 16:19 დამარცხდა. ნემსაძე სასტარტო შემადგენლობაში იყო და შეუცვლელად ითამაშა, ოღონდ 7-იდან მე-17 წუთამდე სინბინში იჯდა. ტაიმი ფრედ, 13:13 დასრულდა, მერე მასპინძლებმა 2 ჯარიმა გაიტანეს, სტუმრებმა მხოლოდ ერთი გაქვითეს და ბოლო წუთზე დამრტყმელს რომ ეხეირა, მატჩი ფრედ დასრულდებოდა.
ვახტანგ მაისურაძისა და ბექა შეყლაშვილის “ალბიმ” ქართულ დერბიში ელიზბარ ყუფარაძის “დაქსი” 33:14 დაამარცხა. შეყლაშვილი სასტარტო შემადგენლობაში იყო და სრულად ითამაშა, მაისურაძე შეცვლაზე 74-ე, ხოლო ყიფარაძე 64-ე წუთზე შევიდა. “ალბიმ” ტაიმი 23:0 მოიგო, 2 ლელო გატანილი ჰქონდა და პრემიალური ქულის აღების შანსი გაუჩნდა, მაგრამ მეორე ნახევარში ორი შეცვდომა 2 ლელოდ დაიჯდა, თავად მხოლოდ ერთი გაიტანა და 4 სატურნირო ქულას დასჯერდა.
ასტამურ იოსელიანისა და ტარიელ რატიანიძის “ნარბონმა” “კარკასონი” 15:12 დაამარცხა. რატიანიძემ შეცვლაზე 15 წუთი ითამაშა, მატჩის მიწურულს ანგარიში 12:12 იყო, 79-ე წუთზე “ნარბონმა” ჯარიმა გაიტანა, 1 წუთში ჯარიმა მეტოქემაც დაარტყა, მაგრამ არაზუსტად და ქართველების გუნდმა გამარჯვება იზეიმა.
2015-2016 წლების პრო დ2-ის სეზონი. XIV ტური
ბეზიე - მონტობანი 38:17
ბეიონი - ორიაკი 13:12
ბურგუენი - ბიარიცი 21:14
ალბი - დაქსი 33:14
კოლომიე - ტარბი 19:16
მონ-დე-მარსანი - ექს-ან-პროვანსი 20:18
ნარბონი - კარკასონი 15:12
პერპინიანი - ლიონი 20:16
გუნდები თ მ ფ წ +/- ქ ბ
| 1. | ლიონი | 14 | 12 | 0 | 2 | 468:237 | 55 |
|
| 2. | ბეიონი | 14 | 9 | 1 | 4 | 370:298 | 44 |
|
| 3. | ბეზიე | 14 | 9 | 1 | 4 | 397:285 | 42 |
|
| 4. | ორიაკი | 14 | 8 | 0 | 6 | 361:302 | 38 |
|
| 5. | პერპინიანი | 14 | 7 | 1 | 6 | 306:284 | 35 |
|
| 6. | კოლომიე | 14 | 7 | 2 | 5 | 281:313 | 34 |
|
| 7. | ალბი | 14 | 7 | 1 | 6 | 268:262 | 33 |
|
| 8. | ნარბონი | 14 | 6 | 0 | 8 | 299:286 | 30 |
|
| 9. | ბურგუენი | 14 | 6 | 0 | 8 | 261:295 | 29 |
|
| 10. | მონ-დე-მარსანი | 14 | 6 | 0 | 8 | 271:294 | 29 |
|
| 11. | მონტობანი | 14 | 6 | 0 | 8 | 274:330 | 27 |
|
| 12. | კარკასონი | 14 | 6 | 0 | 8 | 245:365 | 26 |
|
| 13. | ბიარიცი | 14 | 5 | 0 | 9 | 289:282 | 24 |
|
| 14. | დაქსი | 14 | 5 | 0 | 9 | 276:347 | 22 |
|
| 15. | ექს-ან-პროვანსი | 14 | 4 | 0 | 10 | 238:378 | 18 |
|
| 16. | ტარბი | 14 | 6 | 0 | 8 | 255:301 | 13 |
ტარბის დაკლებული აქვს 15 ქულა
XV ტური. 14,15, 17 იანვარი
ორიაკი - მონ-დე-მარსანი; ლიონი - ნარბონი; ბიარიცი - კოლომიე; კარკასონი - ალბი; ტარბი - ბეიონი; დაქსი - ბეზიე; მონტობანი - ბურგუენი; ექს-ან-პროვანსი - პერპინიანი
