11 აგვისტოს, უეფას სუპერთასის მატჩზე, გათვალისწინებულია სპეციალური ადგილები შეზღუდული შესაძლებლობების მქონე პირებისთვის.

შშმ პირები და მათი თანმხლები პირები განთავსდებიან „დინამო არენას“ აღმოსავლეთ ტრიბუნაზე, მე-15-16 სექტორებში. მათთვის სპეციალური შესასვლელი იქნება B ზონიდან (მთავარი შესასვლელის გვერდით, ცაბაძის ქუჩიდან).

მოცემულ სექტორებში, ეტლით მოსარგებლე პირებისთვის გათვალისწინებულია 40 ადგილი; პლიუს 40 - მათი თანმხლები პირებისათვის. ხოლო უეტლო შშმ პირებისთვის - 10 ადგილი (პლიუს 10 - თანმხლები პირებისთვის).

შეზღუდული შესაძლებლობების მქონე პირებისთვის გათვალისწინებულია 18-ლარიანი ბილეთები. სფფ-ის თანამშრომლების გადაწყვეტილებით, ისინი დააფინანსებენ ამ ბილეთების მომავალ მფლობელებს და საჩუქრად გადასცემენ ყველა შშმ პირს.

ბილეთების გაცემა მოხდება ფეხბურთის ფედერაციაში. გარკვეული მოსამზადებელი სამუშაოების შემდეგ, სავარაუდოდ, უახლოეს მომდევნო კვირაში დაიწყება ბილეთების გაცემა. მანამდე, თითოეულ მათგანს ინდივიდუალურად ეცნობება ამის შესახებ.

ბილეთების მისაღებად, შშმ პირებმა უნდა წარმოადგინონ თავისი სტატუსის დამადასტურებელი ცნობისა და პირადობის დამადასტურებელი დოკუმენტის ასლი.

გისურვებთ წარმატებებს და გვიხარია, რომ გმასპინძლობთ!

სფფ-ის პრესსამსახური