„კიოლნის“ ფეხბურთელმა ლუკა ლოჩოშვილმა გერმანულ მედიას ინტერვიუ მისცა, რომელშიც სხვადასხვა თემაზე ისაუბრა.

ქართველმა მცველმა მედიას გაუზიარა პირველი შთაბეჭდილებები, მოლოდინები და ის, თუ რისი შეტანა შეუძლია გუნდში.

- როგორია პირველი შთაბეჭდილებები?

- ძალიან კარგი შეგრძნებები მაქვს, ძალიან პოზიტიურად ვარ განწყობილი. ძალიან ბედნიერი ვარ, რომ აქ ვარ, ამ დიდ და ისტორიულ კლუბში ვითამაშებ. ჯერჯერობით მხოლოდ კარგი და პოზიტიური შთაბეჭდილებები მაქვს, რადგან გუნდი შესანიშნავია - როგორც სამწვრთნელო შტაბი, ისე ფეხბურთელები. აქ ძალიან თბილი ატმოსფეროა, ყველა ერთმანეთს ეხმარება და მხარს უჭერს. ასე რომ, პირველი დღეები ნამდვილად ძალიან სასიამოვნო აღმოჩნდა.

- რა შეგიძლია გუნდს შემატო?

- ვფიქრობ, შემიძლია გუნდს შევმატო მენტალიტეტი როგორც მოედანზე, ისე მის გარეთ. ასევე ფიზიკური ძალა და აგრესიულობა. მგონია, ეს ჩემი თამაშის ერთ-ერთი ძლიერი მხარეა. იმედი მაქვს, რაღაც მნიშვნელოვანს შევმატებ და გუნდს მაქსიმალურად დავეხმარები. ვნახოთ, როგორ განვითარდება ყველაფერი.

- როგორი იყო კლუბთან მოლაპარაკებები?

- ბევრი ვისაუბრეთ. მათ ჩემი დამატება დიდი ხანია სურდათ და რამდენიმე საინტერესო საუბარიც გვქონდა. ეს პროექტი ჩემთვის ძალიან მიმზიდველი აღმოჩნდა. მხოლოდ პოზიტიური შთაბეჭდილებები დამრჩა. მათ ამიხსნეს, რატომ უნდოდათ ჩემი დამატება, რა მოსწონთ ჩემში, რა შემიძლია გუნდს შევმატო. ჩვეულებრივი, მაგრამ ძალიან კარგი საუბრები იყო. ამ შესაძლებლობით ძალიან ბედნიერი ვარ, რადგან ვხედავ, რომ ეს სწორი არჩევანია. სწორედ ამიტომ გადავწყვიტე აქ მოსვლა.

- ერთ-ერთი რამ, რასაც შენგან ელიან, ლიდერობაა. პირველივე სეზონში ამ როლის შესრულება რთული ხომ არ იქნება?

- დიახ, ეს მართლაც ერთ-ერთი მოლოდინია. როგორც უკვე ვთქვი, ვფიქრობ, ლიდერობა ჩემი თამაშით უნდა ვაჩვენო. მინდა, ლიდერი ვიყო ჩემი მოედანზე მოქმედებითა და შესრულებით. არ ვარ ისეთი ადამიანი, რომელიც უაზროდ ყვირის ან მხოლოდ სიტყვებით ცდილობს ლიდერობას. მაქვს საერთაშორისო მატჩებში მიღებული გამოცდილება და იმედი მაქვს, ამ გამოცდილებით გუნდს დავეხმარები. თუ ახალგაზრდა ფეხბურთელებს ჩემი დახმარება დასჭირდებათ, სიამოვნებით დავეხმარები. ამავდროულად, მეც შემიძლია რაღაც ვისწავლო მათგან. არ ვფიქრობ, რომ მხოლოდ მე უნდა ვლაპარაკობდე. მინდა, ჩემი გამოცდილება და ცოდნა გუნდს გამოადგეს და მაქსიმალურად სასარგებლო ვიყო. ამას მოუთმენლად ველოდები.

- სეზონის პირველ მატჩში უკვე გაიტანე გოლი. შეიძლება ეს რაღაც დიდის დასაწყისი იყოს?

-იმედი მაქვს, ასე იქნება. მინდა, ამ მაისურით კიდევ ბევრი გოლი გავიტანო და გუნდს მაქსიმალურად დავეხმარო. თუმცა ყველაზე მეტად ოფიციალურ მატჩებში გატანილი გოლები მიყვარს, რადგან სწორედ ესაა მთავარი. ამიტომ მოუთმენლად ველოდები ოფიციალურ შეხვედრებს და ყველაფერს გავაკეთებ, რომ იქაც გავიტანო. ყოველდღე ბევრს ვვარჯიშობ ამისთვის. ვნახოთ, როგორ წავა ყველაფერი.

- ამბობენ, რომ ცენტრალური დაცვა გუნდის ყველაზე ძლიერი რგოლია. ეთანხმები ამას?

- არ ვიცი. ვფიქრობ, ყველა პოზიციაზე ძლიერი ფეხბურთელები გვყავს. ჯერ ძალიან ცოტა ხანია აქ ვარ და მეტი დრო მჭირდება, რომ ზუსტი შეფასება გავაკეთო. მოსამზადებელი პერიოდის მხოლოდ ერთი კვირა გავიარეთ. ვფიქრობ, რეალური სურათი მომზადების ბოლოს გამოჩნდება. ამ ეტაპზე შემიძლია ვთქვა, რომ გუნდის ყველა რგოლი კარგია. ყველაზე მნიშვნელოვანი კი ის არის, რომ ყველა ფეხბურთელი მოტივირებულია. გუნდში კონკურენციაა, ხოლო როდესაც კონკურენცია არსებობს, ყველა საკუთარ 100%-ს დებს.

- ბუნდესლიგაში, ისეთი თავდამსხმელის წინააღმდეგ თამაში მოგიწევს, როგორიც ჰარი კეინია. ამას მოუთმენლად ელოდები?

- რა თქმა უნდა. ამას ნამდვილად მოუთმენლად ველოდები, რადგან ძალიან მომწონს მსგავსი გამოწვევები. უკვე მითამაშია რამდენიმე მაღალი დონის თავდამსხმელის წინააღმდეგ, მაგრამ რაც უფრო ძლიერი მეტოქეა, მით მეტად მსიამოვნებს. ასეთი შეხვედრები ჩემთვის დიდი შესაძლებლობაა, ძალიან კარგი გამოცდილებაა და განსაკუთრებულ განცდას მაძლევს. ბედნიერი ვარ, რომ ამის ნაწილი ვიქნები და მოუთმენლად ველოდები ამ მატჩებს.