საქართველოს საკალათბურთო ნაკრებს ისევ ილიას ზუროსი გაწვრთნის. როგორც კალათბურთის ფედერაციის ვებგვერდი ოფიციალურად იტყობინება, ხელშეკრულება მხარეებს შორის უკვე გაფორმდა. ზუროსი ჩვენი ქვეყნის მთავარ გუნდს მომდევნო ორი წლის განმავლობაში, მსოფლიოს ჩემპიონატის შესარჩევ ეტაპზე გაწვრთნის.

შეგახსენებთ, ილიას ზუროსმა საქართველოს ნაკრები 2015 წელს ჩაიბარა და გუნდი ევროპის ჩემპიონატზე გაიყვანა. სადაც, საქართველომ ლიტვის ნაკრები დაამარცხა, მაგრამ ჯგუფიდან გასასვლელად ეს საკმარისი არ გამოდგა.

"მოხარული ვარ, რომ ახალი, ორწლიანი კონტრაქტი გავაფორმეთ. ეს ნიშნავს, რომ ორივე მხარე კმაყოფილია, მეც და საქართველოს კალათბურთის ფედერაციაც. განვლილ ორ წელიწადში გავმართეთ ევროპის ჩემპიონატის შესარჩევი მატჩები და ვიასპარეზეთ ევრობასკეტზე.

მომდევნო ციკლი მსოფლიო თასის საკვალიფილაციო ეტაპებია. წინასწარ შეიძლება ითქვას - მძიმე სიტუაციაა, რადგან განახლებული გუნდით მოგვიწევს გამოსვლა. თუმცა მოხარული ვარ, რომ ახალ ციკლს ახალი იმედითა და კარგის მოლოდინით ვიწყებთ.

არ გვეყოლება ზაზა ფაჩულია და ვიქტორ სანიკიძე, რომლებიც ბოლო წლებში გუნდს ძალიან ეხმარებოდნენ, თავს არ ზოგავდნენ.

საქმე ძალიან გართულდა მას მერე, რაც ფიბა და ევროლიგა ვერ შეთანხმდნენ... შესაბამისად, დღევანდელი სიტუაციით ნაკრებში ვერც ევროლიგის კალათბურთელები ითამაშებენ. არ გვეყოლებიან თორნიკე შენგელია და გიორგი შერმადინი. მოგეხსენებათ, ბექა ბურჯანაძემც ოპერაცია გაიკეთა, როგორც ვიცი, ყველაფერმა კარგად ჩაიარა. იმედი გვაქვს, რომ იგი მალე დაუბრუნდება მოედანს. ჯანმრთელობას ვუსურვებ. ძალიან, ძალიან მაგრად უნდა ვიბრძოლოთ, რომ ამ კალათბურთელების არყოფნის ფონზე დადებით შედეგს მივაღწიოთ.

დავიწყებთ იმ რესურსით, რაც ჩვენს ხელთაა. იმედი მაქვს, სხვები ითამაშებენ, გვიჩვენებენ, რომ შეუძლიათ... ახლა, საჭიროა, ვიპოვოთ საუკეთესო კალათბურთელები საქართველოს ნაკრებისთვის, ნაბიჯ-ნაბიჯ ვიაროთ და გავუმჯობესდეთ თამაშიდან თამაშამდე.

მნიშვნელოვანია ყველა ერთად დავდგეთ, მივიღოთ სწორი გადაწყვეტილებები. მჯერა, რომ ამ საკვალიფიკაციოზე წარმატებით თამაში შეგვიძლია, უნდა გავიდეთ შემდეგ ეტაპზე და განვაგრძოთ ბრძოლა მთავარი მიზნისთვის", - ციტირებს ზუროსის სიტყვებს კალათბურთის ფედერაციის ვებგვერდი.

აქვე გეტყვით, რომ ნოემბერში ზუროსს და საქართველოს ნაკრებს მორიგი გამოცდა ელოდებათ: მსოფლიოს 2019 ჩემპიონატის შესარჩევი ეტაპი დაიწყება, რომელშიც ქართველთა მეტოქეები სერბეთი, გერმანია და ავსტრია იქნებიან.