სარეკლამო ადგილი - 3
227 x 91
ბლოგი

12:00 | 8.10.2017 | ნანახია 446 - ჯერ

წარმატება თუ ბავშვობა?

ბევრს ახსოვს რამდენიმე წლის წინ კატალონიის “ბარსელონას“ არასრულწლოვან ფეხბურთელებთან საიდუმლო კონტრაქტის გაფორმების გამო სეზონის განმავლობაში ტრანსფერების განხორციელება და ფეხბურთელების შეძენის უფლება რომ შეუზღუდეს. ეს პრობლემური საკითხი ევროპულ ფეხბურთშში და ზოგადად მსოფლიო სპორტში ცხადია მხოლოდ კატალონიური კლუბის დასჯით არ ამოწურულა და დღესაც მნიშვნელოვან პრობლემად რჩება.

ჯერ კიდევ სკოლის ასაკის ტალანტი ფეხბურთელების ძიება, მსოფლიოს ბობოლა კლუბების ძველი და ნაცადი სტრატეგიაა და ამაზე მრავალი ცნობილი ფეხბურთელი საკუთარი ბიოგრაფიული შტრიხების გამომზეურებისასაც ყვება. მიუხედავად იმისა, რომ გაერო და მრავალი ბავშვთა უფლებების დამცველი ორგანიზაცია ბრძოლას უცხადებს არასრულწლოვანთა შრომას (და სპორტსმენად ჩამოყალიბების პროცესი ხშრად ნებისმიერ ფიზიკურ შრომაზე მძიმეა) დიდი ფინანსური მოგების სურვილი ხშირად ყოველგვარ სასჯელის შიშს სძლევს და აფრიკაში, სამხრეთ ამერიკასა თუ აზიაში უამრავი სპორტული სკაუტი დასუნსულებს, რომლებიც ზოგი საბუთების გაყალბების გზით უმატებს ახალგაზრდა ნიჭიერ ბავშვებს ასაკს, ზოგი კი სულაც არაოფიციალურად უფორმებს რაიმე სახის კონტრაქტს მის მშობლებს და ამ გზით იბევებს მომავლის ვარსკვლავს. მაგალითად, ფიფამ გამოიკვლია, რომ ერთ-ერთმა ბრაზილიურმა საფეხბურთო კლუბმა ნიჭიერი ტალანტის მამას კონტრაქტი დამლაგებლის პოზიციაზე გაუფორმა და ამ გზით უხდიდა ხელფასს 14 წლის მოზარდს, რომელიც ოფიციალურად კლუბის წევრადაც კი არ იყო გაფორმებული.

საქართველოსთანა ქვეყანაში, სადაც სპორტის მთელი რიგი სახეობები დიდ კრიზისს განიცდიან, ნიჭიერი ბავშვების მშობლები რა გასაკვირია რომ პირველ ყოვლისა შვილების სხვა ქვეყანაში წაყვანაზე და ამ გზით მათი სპორტული შესაძლებლობების გაუმჯობესებაზე ფიქრობენ და ოცნებობენ. ცხადია ვერავის დავძრახავთ, რადგან წარმატება ყველას სურს და არავის მოეთხოვება ფუჭ იმედებს გამოიკიდოს. თუმცა, სამწუხაროდ ევროპის ქვეყნებში წასული ქართველი მოზარდებიც ხშირად ხდებიან ბობოლა კლუბების დიდი მადის მსხვერპლი და ყალბი კონტრაქტები და საბუთებში ასაკმომატებული ბავშვები არც ჩვენი სპორტისთვისაა უცხო. ეს პრობლემა განსაკუთრებით საგრძნობია ფეხბურთში, ჭიდაობასა და კალათბურთში.

მოზარდის ნიჭის საზომად ცხადია მხოლოდ მისი ტრანსფერის ღირებულება ვერ გამოდგება, თუმცა თუ ბოლო პერიოდში განხორციელებული ასტრონომიულ თანხებში გამოხატულ საფეხბურთო ტრანსფერების დინამიკას გადავხედავთ მარტივად დავინახავთ, რომ ესაა ერთ-ერთი ყველაზე სარფიანი ბიზნესი და ეს ბიზნესი კიდევ უფრო და უფრო შლის ფრთებს მიუხედავად იმისა, რომ ამ ბიზნესს ხშირად მოზარდების უფლებები ეწირება. წარმატება და ცნობადობა სანუკვარი რამაა, მაგრამ ღირს ეს ყველაფერი ბავშვობის დაკარგვად? წესით ეს რიტორიკული კითხვა საერთოდ არც უნდა დავსვათ.

სარეკლამო ადგილი - 25
710 x 104
Loading...

კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
სარეკლამო ადგილი - 22
250 x 250
0.151803