ამ დღეებში გორელმა ძიუდოისტებმა წარმატებით იასპარეზეს გროზნოსა და ყაზახეთში გამართულ საერთაშორისო ტურნირებზე. შინ დაბრუნებულებმა კი ამ შეჯიბრებებზე ასპარეზობასთან დაკავშირებით გორის მუნიციპალიტეტის სპორტული სკოლების გაერთიანების მიერ ორგანიზებულ პრესკონფერენციაზე მედიასთან და გულშემატკივრებთან ისაუბრეს.

27-28 სექტემბერს გროზნოში ისაევის ხსოვნის მემორიალურ ტურნირზე გორის გუნდმა 1 ოქროს და 2 ვერცხლის მედალი დაისაკუთრა. შეჯიბრების გამარჯვებული გახდა ალექსანდრე ზაალიშვილი (100 კგ), რომელმაც პირველივე პაექრობაში რუსეთის მოქმედი ჩემპიონი აშხაბ კოსტოევი დაამარცხა, შემდეგ კიდევ სამ ფალავანს აჯობა და ისვე, როგორც 2015 წელს ამჯერადაც ამ ტურნირის კვარცხლბეკის პირველ საფეხურზე დადგა. აქვე ვერცხლის პრიზიორები გახდნენ ზურაბ კახნიაშვილი (60) და პაატა ღვინიაშვილი (90). გუნდს ხელმძღვანელობდა ანზორ თენაძე.

28 სექტემბერს ქალაქ აქტობეში (ყაზახეთი) გორელ ძიუდოისტთა გუნდი ყახაზეთის პრეზიდენტის თასზე გამართულ გუნდურ პირველობაში ბრინჯაოს პრიზიორი გახდა. საქართველოს სახელით აქტობეში იასპარეზეს გორელებმა - ვანო თოთლაძემ (66), ტატო ტატულაშვილმა (73), ანზორ ბიბილაშვილმა (81), გიორგი პაპუნაშვილმა (90) და ონისე ბუღაძემ (მძიმე). მათ პირველ შეხვედრაში ყაზახეთის I ნაკრებთან წაგების შემდეგ სამი გუნდური პაექრობა (ყაზახეთის II ნაკრებთან, აზერბაიჯანთან და ბელარუსთან) მოიგეს და საბოლოოდ ბრინჯაოს მედლის მფლობელები გახდნენ.

ყაზახეთში ქართველთა გუნდს საქართველოს დამსახურებული მწვრთნელი ნიკო ბიბილაშვილი ხელმძღვანელობდა.

გორის მუნიციპალიტეტის სპორტული სკოლების გაერთიანებაში დღეს გამართულ პრესკონფერენციაზე გროზნოსა და აქტობეში წარმატებით მოასპარეზე გორელმა სპორტსმენებმა და მწვრთნელებმა ჟურნალისტებს და ქომაგებს აღნიშნულ საერთაშორისო შეჯიბრებებზე მათი გამოსვლის შესახებ ესაუბრნენ.

ტურნირებზე მონაწილეობაში გორელ ძიუდოისტებს ხელი შეუწყო გორის სპორტული სკოლების გაერთიანებამ. გაერთიანების ხელმძღვანელმა გიორგი პურიჭამიაშვილმა პრესკონფერნციაზე მადლობა გადაუხადა სპორტსმენებს მიღწეული წარმატებებისათვის და სამომავლოდაც შეპირდა ხელშეწყობას ასეთ შეჯიბრებებზე მონაწილეობის მისაღებად.

ვასილ ბალახაძე