ფეხბურთი

22:45 | 4.09.2017 | ნანახია [] - ჯერ

ვლადიმირ ვაისი: "ვენაში სამი ქულისთვის ვიმყოფებით"

საქართველოს ეროვნული ნაკრების მთავარმა მწვრთნელმა ვლადიმირ ვაისმა ავსტრიის ნაკრებთან თამაშის წინ პრესკონფერენცია გამართა. სლოვაკი სპეციალისტი მეტოქეს პატივს სცემს და ამბობს, რომ ძლიერი გუნდია, რომელიც მეოთხე ადგილზე არ უნდა იყოს.

თუმცა, აღნიშნა, რომ საქართველოს ნაკრები ვენაში ერთი მიზნითაა ჩასული: სამი ქულისთვის.

“ავსტრია კარგი გუნდია, რომელიც მეოთხე ადგილზე ყოფნას არ იმსახურებს. თუმცა, ამ გუნდს ევროპის ჩემპიონატიდან მოყოლებული არ უმართლებს. ავსტრიას მსოფლიო დონის ფებხურთელები ჰყავს, მაგალითად დავიდ ალაბა და მარკო არნაუტოვიჩი. უელსთან მარცხს რაც შეეხება, ავსტრია ჯგუფის საუკეთესო გუნდთან დამარცხდა.

მეტოქე გამარჯვებას აუცილებლად შეეცდება, თუმცა ჩვენ ვენაში ქალაქის დასათვალიერებლად არ ჩამოვსულვართ, აქ მხოლოდ 3 ქულის მოსაპოვებლად ვიმყოფებით. თბილისში, ერთი წლის წინ 1:2 წავაგეთ, მაგრამ იმის შემდეგ საქართველოს ნაკრებმა თამაში გააუმჯობესა და უფრო თავდაჯერებული გახდა”, - აღნიშნა ვლადიმირ ვაისმა.

სლოვაკთან ერთად ავსტრიული მედიის წინაშე გიორგი ქვილითაია წარსდგა, რომელიც იქაურობას კარგად იცნობს – “რაპიდის” ფეხბურთელია:

“ირლანდიის ნაკრებთან კარგი ფეხბურთი ვაჩვენეთ და მეტოქეს ვაჯობეთ. დარწმუნებული ვარ, ხვალ საქართველოს ნაკრები გაიმარჯვებს”, - დასძინა გიორგიმ.

შეგახსენებთ, საქართველოსა და ავსტრიის ნაკრებთა შეხვედრა 5 სექტემბერს, 22:45 საათზე დაიწყება. მატჩი ვენაში, “ერნსტ ჰაპელის” სტადიონზე გაიმართება.

0.118675