ლეგენდარული იტალიელი ფეხბურთელი ანდრეა პირლო კარიერის მიწურულშია და შესაბამისად, ფართო საზოგადოების წინაშე ხშირად გამოჩენა არ უწევს. “ნიუ იორკ სიტის” 38 წლის ნახევარმცველს იტალიურმა გამოცემა La Repubblica-მ ინტერვიუ ჩამოართვა. ვეტერანის თქმით, იტალიური ფეხბურთი ღრმა კრიზისშია და სხვებისთვის კონკურენციის გაწევა უახლოეს მომავალში გაუჭირდება.
საუბარი კი “იუვენტუსისა” და ლეონარდო ბონუჩის განშორების თემით დაიწყო:
“იუვენტუსი” ისევ ისეთი ძლიერი იქნება. ბონუჩი წავიდა, მაგრამ მოვიდნენ დუგლას კოშტა, ფედერიკო ბერნარდესკი და ვოიცეხ შჩესნი. დიდი შანსია, ახალი ფეხბურთელები კიდევ დაიმატონ”.
- კიელინიმ განაცხადა, რომ “იუვენტუსს” ბონუჩი დააკლდება, როგორც ადამიანი, მაგრამ არა როგორც ფეხბურთელი...
- ბონუჩი “მილანს” დიდ ქარიზმას შემატებს და მოუტანს საერთაშორისო გამოცდილებას. “იუვენტუსს” კი მისი ტექნიკური არსენალი დაცვაში და ბურთთან თამაში ნამდვილად დააკლდება.
- ბონუჩიმ ტურინი ალეგრის გამო დატოვა. ისევე, როგორც თქვენ - “მილანი”?
- არ ვიცი, რა მოხდა მათ შორის, მაგრამ მე “მილანიდან” ალეგრის გამო არ წავსულვარ. კონტრაქტი მეწურებოდა და კარიერაში ახალი გამოწვევის მიღება მსურდა. შემეძლო “მილანში” დარჩენაც, თუმცა ვგრძნობდი, რომ ერთი ეტაპი უნდა დამესრულებინა.
- “მილანი” სკუდეტოსთვის იბრძოლებს?
- არ მგონია. როდესაც იწყებ ნულიდან, ყიდულობ ათ ფეხბურთელს, რთულია, დაუყოვნებლივ წარმატებას მიაღწიო. შეთამაშებას დრო დასჭირდება, მონტელას კი რთული სამუშაოს გაწევა მოუწევს. ვფიქრობ, ჩემპიონთა ლიგის ზონაში მოხვედრა მთავარი მიზანი იქნება.
- შეიძლება, ეს წელი “ნაპოლის” იყოს?
- ყოველ წელს ამბობენ, რომ “ნაპოლი”, “რომა” და სხვები კარგად ითამაშებენ, მაგრამ ყველამ ვიცით, როგორ სრულდება სეზონი...
- მოგენატრათ იტალიური ფეხბურთი?
- არა. მე იქ დარჩენის არანაირი სურვილი არ მქონდა. ახალი თავგადასავალი მჭირდებოდა.
- შეუძლია სერია A-ს ახლო მომავალში უმაღლეს დონეზე დაბრუნება?
- ეს შეუძლებელია მინიმუმ 10 წლის განმავლობაში. იტალიური ფეხბურთი ვერ უწევს კონკურენციას დანარჩენებს, მაგალითად ინგლისს. იტალიაში არც ფულია, არც ინფრასტრუქტურა და საერთოდ, დიდი უფსკრულია.
- ითამაშებთ 40 წლამდე, როგორც ფრანჩესკო ტოტი?
- “ნიუ იორკ სიტისთან” კონტრაქტი დეკემბერში მეწურება. უკვე ვფიქრობ მომავალზე: არ ვიცი, მენეჯერი ვიქნები თუ მწვრთნელი, მაგრამ ფეხბურთში აუცილებლად დავრჩები. ყოველთვის ამ საქმეს ვაკეთებდი და სხვა არაფერი შემიძლია.
- თქვენს კარიერაში ყველაზე მეტად რაზე გწყდებათ გული, “ოქროს ბურთზე”?
- არა, გული არაფერზე მწყდება. ყველაფერი მოვიგე. ყოველთვის თავად ვიღებდი გადაწყვეტილებას, სად წავსულიყავი, სად მეთამაშა. დღეს ასეთი რამ ხშირად არ ხდება.
