ამსტერდამის “აიაქსი” ცალი ფეხით ევროპა ლიგის ფინალშია. ჰოლანდიური გრანდი საკუთარ მოედანზე “ლიონს” დაუხვდა და შეიძლება ითქვას, რომ მოულოდნელად, მეტოქე სამბურთიანი სხვაობით დაამარცხა.

მასპინძლებმა ნამდვილად ჩინებული შთაბეჭდილება დატოვეს და შეიძლებოდა, კიდევ უფრო დიდი ანგარიშით ემარჯვათ. ჰოლანდიელებმა ენტონი ლოპეშის კარის ჩარჩოში ზუსტად 16-ჯერ დაარტყეს და ამით ყველაფერი ნათელია.

ამსტერდამული გრანდი 25-ე წუთზე დაწინაურდა: ჰაკიმ ზიეჩის მოწოდებულ სტანდატულს ბერტრან ტრაორე გამოეხმაურა და თავური დარტყმით ლოპეში გააშეშა. ათიოდე წუთში ტრაორემ თავით უკვე საგოლე გადაცემა გააკეთა – მან კასპერ დოლბერი მეკარესთან პირისპირ დატოვა და ახალგაზრდა ფორვარდმა შანსი არ გაუშვა. ამინ იუნესს ტაიმის ბოლოს მესამეს გატანაც შეეძლო, მაგრამ ხელსაყრელი პოზიციიდან ლოპეშს ვერ აჯობა.

სამაგიეროდ, იუნესმა ხუთიოდე წუთში ივარგა და პორტუგალიელი კიპერი მესამედ დაამწუხრა. ამის შემდგომ ცოტათი “ლიონიც” გამოფხიზლდა და 66-ე წუთზე მატიე ვალბუენამ უზუსტესი დარტყმით ერთი ბურთქი დაქვითა, თუმცა ხუთ წუთში მასპინძლებმა ბრწყინვალე კომბინაცია გაითამაშეს, რომელიც ტრაორეს გოლით დასრულდა და კვლავ სამბურთიანი სხვაობა აღდგა. დარჩენილ დროში ანგარიშის შეცვლა ორივე გუნდს შეეძლო, მაგრამ მეკარეებმა ამის გაკეთების საშუალება არავის მისცეს – 4:1.

აიაქსი – ლიონი 4:1 (2:0)

ამსტერდამი, “ამსტერდამ არენა”

აიაქსი (4-3-3): ონანა, დე ლიგტი, დ.სანჩესი, რიედევალდი, ტეტე, კლაასენი, ზიეჩი, შონე (ვან დე ბიკი 71), იუნესი (კლიუვერტი 79), ბ.ტრაორე, დოლბერგი (ნერესი 88).
მწვრთნელი: პიტერ ბოში

ლიონი (4-2-3-1): ლოპეში, ნ’კულუ, დიაკაბი, მორელი, ჟალე (რაფაელი 69), გონალონსი, ტუსარტი (გეჟალი 58), კორნე (ლაკაზეტი 76), ტოლისო, ვალბუენა, ფეკირი.
მწვრთნელი: ბრუნო გენესიო

გოლები: 1:0, 4:1 ბ.ტრაორე (25; 71), 2:0 დოლბერგი (34), 3:0 იუნესი (49), 3:1 ვალბუენა (66)
გაფრთხილებები: დე ლიგტი, ბ.ტრაორე – გონალონსი
მსაჯი: ჯანლუკა როკი