ლეგენდარული იტალიელი მეკარე ფრანჩესკო ტოლდო „სკუადრა აძურას“ იმედისმომცემი კარის დარაჯის ჯანლუიჯი დონარუმას შესახებ საუბრობს. 46 წლის ტოლდოს თქმით, დონარუმა უნიჭიერესია, თუმცა სანამ ფეხბურთს ჯანლუიჯი ბუფონი თამაშობს, მანამდე იგი ნაკრებში პირველი მეკარე ვერ გახდება.

„დონარუმა მშვენიერი მეკარეა და იგი ერთ-ერთია მათ შორის, რომელიც ძალიან მომწონს. მას ბუფონი ნაკრებში ძალიან დაეხმარება, მაგრამ თუ დონარუმა შანსს მიიღებს, ეს მხოლოდ მაშინ მოხდება, როცა ბუფონი გადაწყვეტს“, - უთხრა ტოლდომ Radio Rai-ს.

ჯანლუიჯი დონარუმას ბევრი ჯიჯი ბუფონის მემკვიდრედ მიიჩნევს - ნიჭიერი მეკარე ახლა მხოლოდ 18 წლისაა. იტალიის ეროვნულ ნაკრებში მას უკვე ორი თამაში აქვს ჩატარებული. სამშაბათს კი, ჰოლანდიასთან ამხანაგურ თამაშში იტალიური მედია დონარუმას ძირითად შემადგენლობაში გამოჩენას ვარაუდობს, რაც მისთვის „სკუადრა აძურაში“ პირველი იქნება.