ვერის ბაღში მდებარე ნონა გაფრინდაშვილის სახელობის ჭადრაკის სასახლე სენიორ მოჭადრაკეთა შორის 2017 წლის ჩემპიონატს მასპინძლობს, რომელშიც 10 ქალბატონი და 37 მამაკაცი მონაწილეობს. ასპარეზობა შვეიცარიული სისტემით 7 ტურად ტარდება და 17 იანვარს დასრულდება.

როგორც ქალებს, ასევე მამაკაცებს შორის პირველ-მეორე ადგილებზე გასული მოჭადრაკეები, შესაბამისად, მსოფლიო და ევროპის ჩემპიონატებზე მონაწილეობის საგზურს მიიღებენ, რომელსაც ჭადრაკის ფედერაცია დააფინანსებს. პირველ ადგილზე გასული საგზურს თვითონ აირჩევს.

ტურნირის საპრიზო ფონდი 2000 ლარია. როგორც ქალებს, ასევე მამაკაცებს შორის პირველ -მესამე ადგილზე გასული მოჭადრაკეები შესაბამისად 500, 300 და 200 ლარს მიიღებენ. თანაბარი ქულების შემთხვევაში უპირატესობა უკეთესი კოეფიციენტის მქონე მოჭადრაკეს მიენიჭება. თანხა არ გაიყოფა.