იტალიური “ემპოლის” გენერალური დირექტორის, მარჩელო კარლის განცხადებით, ლევან მჭედლიძის პროგრესი ეჭვს არ იწვევს. როგორც იტალიელმა გამოცემა il tirreno-სთან ინტერვიუში თქვა, ეს მუდმივი სათამაშო პრაქტიკის დამსახურებაა.
“მჭედლიძის თამაშით კმაყოფილები ვართ - ლევანმა მიიღო მუდმივი სათამაშო დრო და მისი პროგრესი აშკარაა. ეს კარგად გამოჩნდა “პალერმოსთან” მატჩშიც, როდესაც საჯარიმოში პოზიცია ჩინებულად შეარჩია და მაკარონეს მოპოვებულ პენალტში დიდი წვლილი მჭედლიძის გადაცემას ჰქონდა”, - განაცხადა კარლიმ.
შეგახსენებთ, ლევან მჭედლიძემ ბოლო ოთხი მატჩი “ემპოლის” სასტარტო შემადგენლობაში გაატარა. აღსანიშნავია, რომ ასეთი რამ 2012 წლის მერე პირველად მოხდა მის კარიერაში. ხსენებულ შეხვედრებში ქართველი ფორვარდის ანგარიშზე სამი გოლია.
