„მერსედესი“ მეორე გუნდია, რომელმაც თავისი ახალი სარბოლო ავტომობილის პრემიერის თარიღი დანიშნა. სამქიმიანებმა თავიანთი საჩემპიონო კამპანიის დასაწყისი 23 თებერვალს დანიშნეს. ბოლიდის ჩვენება სილვერსტოუნზე გაიმართება.

ეს კი ნიშნავს, რომ ჩემპიონების W08-ს, მეტოქე „ფერარის“ ახალ ბოლიდზე ერთი დღით ადრე ვნახავთ. შეგახსენებთ, რომ მარანელოელებს თავიანთი ავტომობილის პრემიერა ფიორანოს ტრეკზე აქვთ დანიშნული.

ახალი სეზონი ძირეულად განსხვავებული ტექნიკური რეგლამენტით ტარდება, რის გამოც, გუნდებს სრულიად ახალი ავტომობილების მომზადება უწევთ. ამიტომ ისინი ცდილობენ, რომ რაც შეიძლება ადრე გამოიყვანონ ახალი სარბოლო ავტომობილები ტრასაზე.

ოფიციალური ტესტები ბარსელონაში 27 თებერვალს დაიწყება, თუმცა გუნდებს საშუალება ექნებათ, ბოლიდები ტრასაზე უფრო ადრე, სარეკლამო სესიებისთვის, ეგრეთ წოდებული „ფილმის დღეს“ გამოიყვანონ, რა დროსაც, მათ ტექნიკის მინიმალური სრულყოფის საშუალება ეძლევათ ხოლმე. „მერსედესი“ ამ შესაძლებლობას სილვერსტოუნის ტრეკზე გამოიყენებს.

სავარაუდოდ, მსოფლიოს ჩემპიონ ნიკო როსბერგის შემცვლელს გუნდი უფრო ადრე დაასახელებს. დიდი ალბათობით, ეს ვალტერი ბოტასი იქნება, რომელმაც უკვე გაიარა სარბოლო სავარძლის მორგების პროცედურა.