ფორმულა 1 საფრანგეთში დასაბრუნებლად მზადაა. ქვეყანაში, სადაც ავტოსპორტის ისტორიაში პირველად ჩატარდა დიდი პრიზის ტიპის რბოლები, ისინი უკვე 10 წელია, არ გამართულა. წინასწარი მონაცემებით, ფრანგულ რბოლას პოლ რიკარი უმასპინძლებს და ეს ეტაპი 2018 წლის კალენდარში შევა.

ამ ინფორმაციას ადასტურებს საფრანგეთის რეგიონ პოვენს-ალპს-ცოტ დ’აზურის მმართველი კრისტიან ესტროსი. მისი თქმით, 2018 წლის სეზონში, ფრანგული ეტაპი ზაფხულში გაიმართება. გარდა ამისა, ესტროსი ამბობს, რომ ფ1-ის მენეჯმენტთან ხუთწლიან კონტრაქტზეა შეთანხმება მიღწეული.

ბოლოს ფ1-ის ბოლიდის საბურავები პოლ რიკარის ტრეკის ასფალტს გასული სეზონის დაწყებამდე შეეხო. ოღონდ ეს იყო ტესტები, რომელზეც „ფერარიმ“, „რედ ბულმა“ და „მაკლარენმა“, „პირელის“ წვიმის საბურავები წინა სეზონის ავტომობილებით გამოსცადეს.

პოლ რიკარის ტრეკზე ბოლოს საფრანგეთის დიდი პრიზი 1990 წელს გაიმართა. შემდეგ ის მანი კურმა ჩაანაცვლა, რომელზეც რბოლა 2008 წლამდე იმართებოდა. პოლ რიკარი კი 1999 წელს დაიხურა და რამდენიმე წლის შემდეგ ისევ გაიხსნა. ამჯერად ის სრულად აკმაყოფილებს ფ1-ის თანამედროვე სტანდარტებს.

საფრანგეთის დიდი პრიზი უძველესია მსოფლიოში და ის პირველად 1906 წელს გამართა. თითქმის საუკუნის შემდეგ კი ეს რბოლა გაუქმდა, რისი მიზეზიც ფინანსური პრობლემები გახდა. ასეა თუ ისე, ეს იქნება მეორე ევროპული რბოლა, რომელიც ბოლო წლებში ფ1-ის კალენდარს დაუბრუნდება. 2014 წელს მსოფლიო ჩემპიონატში ავსტრიის დიდი პრიზი დააბრუნეს.

სამაგიეროდ, მომავალ სეზონში არ გაიმართება გერმანული ეტაპი. სინგაპური და მალაიზია კი აღარ აპირებენ ფ1-თან კონტრაქტების გაგრძელებას.