ყაზანის “რუბინის” ქართველი მცველის სოლომონ კვირკველიას მდგომარეობა კლუბში კვლავ უცვლელია. ჩვენებურს რუსულ გუნდში თავის გამოჩენის საშუალება არა და არ ეძლევა. თამაშს ვინ ჩივის, განაცხადსაც არ აკარებენ. ერთადერთი გამონაკლისი ბოლო ტურში დაფიქსირდა, როდესაც “ზენიტთან” შეხვედრას მან სათადარიგო სკამიდან მიადევნა თვალი.

ამ საკითხან დაკავშირებით ცნობილმა რუსმა სპეციალისტმა, “რუბინის” ყოფილმა მთავარმა მწვრთნელმა რინატ ბილიალეტდინოვმა sovsport.ru-სთან ინტერვიუში ისაუბრა. ბილიალეტდინოვი არ ეთანხმება ყაზანური კლუბის გადაწყვეტილებას და ამბობს, რომ კვირკველიას, როგორც მოთამაშის ხელოვნურად “მოკვლა” ყოვლად დაუშვებელია.

“კვირკველია ძალიან კარგი მცველია და შეუძლია გახდეს დიდი ფეხბურთელი. მისი ხელოვნურად “მოკვლა” არ შეძლება! შესაძლოა, “რუბინის” სამწვრთნელი სტაფი მიიჩნევს, რომ იგი კარგ ფორმაში არაა, მაგრამ მე ვერ ვხედავ გუნდში ისეთ ფეხბურთელს, რომელიც მას აღემატება. არ დაგვავიწყდეს, რომ იგი საქართველოს საუკეთესო ფეხბურთელია გასული სეზონის შედეგების მიხედვით. ვინმეს შესაძლოა ეს წვრილმანად ეჩვენება, მაგრამ დამიჯერეთ, ამ წოდებას ტყუილად არავის აკუთვნებენ, მან ეს კარგი თამაშით დაიმსახურა. პირადად მე დარწმუნებული ვარ, სოლომონი ითამაშებს და მასზე მოთხოვნა იქნება არამარტო ჩვენს ლიგაში, არამედ ევროპაში. ახლა მისთვის მთავარი სათამაშო პრაქტიკაა - თუნდაც სხვა გუნდში.

- კი, მაგრამ კვირკველიას აგენტმა განაცხადა, რომ იგი გუნდს დატოვებს მხოლოდ იმ შემთხვევაში, თუ შეთავაზება “სპარტაკიდან” და “ზენიტიდან” ექნება...

- იქნებ მხოლოდ რუსული გუნდები იგულისხმა? – თუკი ჩვენს რომელიმე კლუბში ვერ მოახერხებს გადასვლას, სხვა ჩემპიონატში უნდა მოძებნოს. ამ საკითხში ორი მხარის ინტერესები უნდა ემთხვეოდეს ერთმანეთს. უხეშად რომ ვთქვათ, უნდა შეთანხმდნენ ფასზე. თუ “რუბინი” მის ტრანსფერში არაადექვატურ თანხას მოითხოვს, მაშინ რა თქმა უნდა კონსენსუსი მიღწეული ვერ იქნება”, - თქვა ბილიალეტდინოვმა.

შეგახსენებთ, კვირკველიას ზაფხულში არაერთი კლუბიდან ჰქონდა შეთავაზებები, თუმცა “რუბინმა” იგი არსად გაუშვა, თან გუნდის მთავარი მწვრთნელი ხავი გრასიაც თამაშის შესაძლებლობას ჯიუტად არ აძლევს, მიუხედავად იმისა, რომ ყაზანელები ამ სეზონში სუსტად ასპარეზობენ.